Саха сирин сайына кылгас да буоллар, биһиги хаһаайкаларбыт даачаларыгар уонна тэлгэһэлэригэр эгэлгэ сибэккини үүннэрэллэр. Олортон биирдэстэрэ — кэрэ көстүүлээх пион. Сахабыт сиригэр пион хойуутук тылларын туһугар сөптөөхтүк аһатыахха наада.
Пионнары хаһан аһатыахха нааданый?
Сайын устата пион түөртэ аһатыллыахтаах:
- Бастакы аһатыы — саас эрдэ оҥоһуллар. Саха сиригэр бу кэм ыам ыйын бүтүүтүгэр эбэтэр бэс ыйын саҥатыгар, сибэкки үнүгэстэрэ быган, 8–10 см уһуннаах буолбуттарын кэннэ аһатыллар.
- Иккис аһатыы — сибэккини таһаарбыт кэмигэр оҥоһуллар.
- Үһүс аһатыы — сибэкки тыллан эрдэҕинэ бэриллэр.
- Төрдүс аһатыы — пион тыллан бүтүннэҕинэ оҥоһуллар.
Биир эбэтэр хас да аһатыыны көтүппүт да буоллаххытына, санааҕытын түһэримэҥ — хаалбыт кэмнэригэр уоҕурдуута кутуҥ. Өскөтүн эгэлгэ уоҕурдуулары булкуйарга уустуктардаах буоллаххытына, пионнарга эбэтэр тыллар сибэккилэргэ аналлаах минеральнай уоҕурдуулары туһаныҥ. Кинилэр бороһуок, гранула уонна убаҕас көрүҥнээх атыыланаллар. Хаатыгар баар ыйыыны-кэрдиини болҕойон ааҕыҥ: онно төһөнү, хайдах кутарыҥ суруллар. Сүрүн быраабыла — минеральнай уонна органическай уоҕурдуулары бэйэ-бэйэлэригэр мээнэ булкуйумаҥ.
Сибэккитэ тыллар кэмигэр хайдах аһатабыт?
Бу кэмҥэ сибэкки бөдөҥ уонна доруобай буоларын туһугар фосфор уонна калий ирдэнэр.
- Минеральнай уоҕурдуунан: Азот, фосфор уонна калий тэҥҥэ баар уоҕурдууларын талыҥ (холобур, 16:16:16, 18:18:18). 1 остолобуой ньуосканы 10 лиитэрэ ууга суурайыҥ уонна кутуҥ. Биир сибэккигэ 2 лиитэрэ барыаҕа. Эбэтэр убаҕаһынан сибэкки сэбирдэҕин ыһыахха сөп. Күн уота сэбирдэҕи сиэбэтин туһугар, ыһыахтыыр үлэни сарсыарда эртэ эбэтэр киэһэ, күн киирбитин кэннэ оҥоруҥ.
- Органическай уоҕурдуунан: Сибэккитэ тыллар кэмигэр калийынан баай мас күлэ олус туһалаах. Биһиги дьон оһох оттор буолан, мас күлүн булар уустуга суох. 100 г күлү 3 лиитэрэ итии ууга кутуҥ. Үчүгэйдик булкуйуҥ уонна ичигэс сиргэ биир суукка туруоруҥ. Онтон ыраас ууну эбэн 10 лиитэрэҕэ тиэрдиҥ уонна сибэкки төрдүгэр кутуҥ. Биир пиоҥҥа 2–3 лиитэрэ уоҕурдуу наада буолуоҕа.