Бэс ыйын 4 күнүгэр »Туймаада» стадиоҥҥа бэһис төгүлүн ыытыллар Үлэ кэлэктииптэрин спартакиадаларын аһыллыыта буолла.
Ааспыт спартакиадаҕа 18 хамаандаттан 1135 спортсмен спорт 14 көрүҥэр күрэхтэспитэ. 190 судьуйа үлэлээбитэ. Бастакы спартакиада 2019 сыллаахха аан бастаан ыытыллыбыта.
Быйыл спартакиада идэлээх сойуустар 105 сылларыгар, судаарыстыбаннай диэйэтэл Илья Винокуров төрөөбүтэ 130 сылыгар ананар. Бу күннэргэ 18 хамаанда спорт 11 көрүҥэр күөн көрсүөҕэ.
Стадиоҥҥа хамаандалар парааттара саҕаланар.
Көҥүл профсоюзтар федерацияларын былааҕын спартакиада хас да төгүллээх чөмпүйүөнэ Александр Маркин тутан таҕыста. Кини Дьокуускайдааҕы ТЭЦ үлэлиир.
СӨ Идэлээх сойуустарын федерациятын былааҕын Тааттатааҕы ОДьКХ электрогазосварщига, хас да төгүллээх чөмпүйүөн Семен Петров тутан таҕыста.
Судьуйалар холуонналара аан аһар. Сүрүн судьуйа — Юрий Иванов. Бу да сырыыга сүүстэн тахса судьуйа үлэлиир.
Аан бастакынан төрдүс спартакиада чөмпүйүөннэрэ »АЛРОСА» хампаанньа »Профалмаз» идэлээх сойуустарын спортсменнара сэлэлии хааман киирэллэр. Бу »АЛРОСА» тэрилтэтигэр 5 тыһыынчаттан тахса киһи үлэлиир.
Салгыы энэргиэтикэ, бырамыысыланнас, үөрэҕирии, наука, култуура, доруобуйа харыстабылын, сибээс, авиация, о.д.а. салаалар хомуур хамаандалара киирэллэр.
СӨ бырабыыталыстыбатын бэрэссэдээтэлин солбуйааччы, оробуочай хамыыһыйа бэрэссэдээтэлэ Сергей Местников:
— Бу бэлиэ дааталар өрөспүүбүлүкэ устуоруйатыгар ураты суолталаахтар. Бу — өрөспүүбүлүкэ сайдыытыгар улахан кылааттаах үлэһит дьон, үлэ кэлэктииптэрин устуоруйалара. Оттон Илья Егорович биһиэхэ барыбытыгар холобур буолар, киэн туттар киһибит. Быйылгы спартакиадаҕа 18 салааттан 1200-тэн тахса киһи кыттар. Эһиги чөл олоҕу, спорду, үлэни өрө тутар, өрөспүүбүлүкэни сайыннарар, холобур буолар дьон буолаҕыт, — диэн эттэ.
Арассыыйа Көҥүл профсойуустарын федерациятын бэрэссэдээтэлин солбуйааччы Сергей Некрасов:
— Бүгүҥҥү бэртээхэй спортивнай бырааһынньыгынан эҕэрдэлиибин! Барыгытыгар кыайыыны баҕарабын. Федерация спартакиада кыайыылаахтарыгар харчынан бирииһин олохтоото.
СӨ идэлээх сойуустарын федерациятын бэрэссэдээтэлэ Николай Дегтярев:
— 1917 сыллаахха идэлээх сойуустар бэриллибиттэрэ эрээри, гражданскай сэрии мэһэйдээбитэ. Онон 1921 сыллаахха профсойуус губернскай сойуустара тэриллибитэ. Ол кэмтэн идэлээх сойуустар чилиэннэрэ, үлэһит дьон спорду өрө туталлар. Ким күүстээх — ол кыайдын!
Спартакиада былааҕын, факелын биллэр-көстөр спортсменнар, спорт бэтэрээннэрэ, чөмпүйүөннэр тутан, сүүрдүлэр. Спартакиада уотун уматар чиэс Бүтүн Арассыыйатааҕы Үлэһиттэр спартакиадаларын кыайыылаахтара Лукиннар дьиэ кэргэттэригэр тигистэ.
Идэлээх сойуустар уонна И.Винокуров үбүлүөйдэригэр анаммыт литературнай-муусукаалынай туруорууну көрдөрдүлэр.
Спартакиада үөрүүлээх аһыллыыта күргүөм оһуохайынан түмүктэннэ.