Киһи үчүгэйдик утуйарын туһугар хоско чуумпу уонна хараҥа буолуохтаах, оттон түргэнник нуурайарга сылаас дуус уонна от чэйэ көмөлөһөр. Бу туһунан «РИА Новости» сомнолог-быраас, мэдиссиинискэй билим хандьыдаата, Дагестаннааҕы судаарыстыбаннай медуниверситет неврологияҕа кафедратын доцена Карема Магомедова кэпсээтэ.
«Чэгиэнник утуйарга утуйар хоһу сөпкө тэрийэр наада. Бастатан туран, күн уотун аһарбат түннүк сабыыта, сытарга табыгастаах матыраас, сыттык уонна сымнаҕас таҥас, чуумпу хос, уоскутар сыт буолуохтаах», — диэн бэлиэтээтэ быраас.
Кини этэринэн, утуйуох иннинэ хос иһигэр салгын киирэрин туһугар булгуччу салгылатыахха наада. Оттон таһырдьа салгын ыраас уонна сылаас буоллаҕына, түннүгү түүнү быһа аһаҕас хаалларыахха сөп.
«Утуйарга бэлэмнэнэр үгэс хас биирдии киһиэхэ тус-туспа буолар. Холобур, сылаас ванна эбэтэр дуус, от чэйэ, кинигэни ааҕыы (ол эрээри детектив буолбатах) олус туһалаах. Массаас эбэтэр тыынар эрчиллиилэр күнү быһа мунньуллубут сылайыыны, күүрүүнү устууга көмөлөһөллөр», — диэн эбэн эттэ Магомедова.