Сэттэ сыл анараа өттүгэр Саха сирэ отуттан тахса сыл кэтэспит историческай сабыытыйата буолбута.
Аллараа Бэстээх ыстаансыйатыгар дьону уонна таһаҕаһы тиэйэр буойастар аартыктара аһыллыбыта.
Бу кэмтэн ыла Аллараа Бэстээхтэн Благовещенскайга, Владивостокка, Хабаровскайга, Иркутскайга диэри быһа сырыы баар буолла. Ол курдук 2019 сылга тэҥнээтэххэ дьону таһыы биэс төгүл улаатта – ааспыт сылга “Саха сирин тимир суоллара” 465 тыһ. пассажиры таспыта, бу 2024 сыллааҕар 10%-нан үрдүк көрдөрүү.
Өлүөнэ өрүһү туоратыыттан саҕалаан автопаарканы тупсарыыга тиийэ дьоҥҥо өҥөнү тупсарыыга көхтөөх үлэ ыытыллар. Аллараа Бэстээххэ пассажирдары кэтэһэр пууннар 2019 сыллаахха тутуллубуттара, 2025 сыл күһүнүгэр «Намыв» кэтэһэр пуун аһыллан үлэҕэ киирбитэ. Бастаан саас уонна күһүн эрэ үлэлиирэ, быйыл сааскыттан саҕалаан сылы эргиччи үлэлиир буолла. Онон Бэстээххэ пассажирдары тиэрдэр бириэмэ лаппа кыччаата.
Аллараа Бэстээх ыстаансыйата аһыллыаҕыттан, логистическай киин быһыытынан таһаҕаһы таһыыга биллэр уларыйыыны киллэрдэ. Ол курдук таһаҕаһы тиэйии кээмэйэ улаатан иһэр: 2025 сылга Аллараа Бэстээх ыстаансыйатынан тиэйиллибит таһаҕас кээмэйэ 1,5 мөлүйүөн туоннаҕа тиийдэ. Манна араас барыта киирэр: ньиэп бородууксуйата, ас-үөл, тутуу матырыйааллара, контейнердар уонна хотугу улуустарга аналлаах араас табаардар.
Тимир суол кэскилэ улахан — Магадан диэки салгыы ыытыы уонна Дьэлиҥдэ — Мохэ аан дойдутааҕы туорааһын аһыллар түгэнигэр Саха сирэ Кытайга тимир суолунан быһа тахсар суолланыаҕа.
“Саха сирин тимир суоллара” АУо пресс-сулууспата