Бүгүн, атырдьах ыйын 4 күнүгэр, Хаҥалас улууһун Өктөмүгэр Саха Өрөспүүбүлүкэтин Бастакы Бэрэсидьиэнэ Михаил Ефимович Николаев олохтон туораабыта үс сылыгар аналлаах траурнай миитин буолан ааста. Кэриэстэбил тэрээһинигэр Михаил Николаев чугас дьоно, аймахтара, бииргэ үлэлээбит үөлээннээхтэрэ, судаарыстыбаннай уонна уопсастыбаннай диэйэтэллэр, өрөспүүбүлүкэ олохтоохторо кытыннылар.
Миитиҥҥэ мустубут дьон чулуу судаарыстыбаннай диэйэтэл сырдык аатын биир мүнүүтэлээх саҥата суох туран чиэстээтилэр уонна өйдөбүнньүккэ тыыннаах сибэккилэри уурдулар.
«Бу атырдьах ыйын күннэрэ биһиги барыбыт үрдүнэн дириҥ кутурҕан күннэринэн буолаллар. Үс сыл ааста, уонна бүгүн биһиги Михаил Ефимович Николаев улуу киһи буоларын, кини өрөспүүбүлүкэҕэ үлэтин-хамнаһын суолтатын өссө дириҥник өйдүүбүт. Саҥа устуоруйа саамай уустук кэмигэр кини Саха сирин дьылҕатын бэйэтин эппиэтинэһигэр сүкпүтэ, туруктаах буолууну оннугар хаалларбыта, сайдыы стратегиятын быһаарбыта уонна дьоҥҥо инникигэ эрэли сахпыта. Кини тыыннаах хаалыы суолун буолбакка, сайдыы суолун талбыта», — диэн Саха сирин Бырабыыталыстыбатын Бэрэссэдээтэлин солбуйааччы Сергей Местников бэлиэтээтэ.
Кини этэринэн, чуолаан Михаил Николаев билиини инники кэскил сүрүн күүһүнэн көрөн, өрөспүүбүлүкэҕэ аныгы үөрэх уонна билим бэлиитикэтин олугун уурбута. Ийэ тылы, култуураны уонна духуобунай сыаннастары норуот сүрүн тирэҕинэн ааҕан, олору харыстааһыҥҥа ураты болҕомтотун уурара. Сергей Местников Бастакы Бэрэсидьиэн Арассыыйа судаарыстыбаннаһын бөҕөргөтүүгэ киллэрбит кылаатын эмиэ тоһоҕолоон эттэ.
Тэрээһин кыттыылаахтарыгар Бастакы Бэрэсидьиэн олоҕун аргыһа Федора Никитична Николаева, Саха Өрөспүүбүлүкэтин Ытык гражданина, Михаил Николаевы кытта бииргэ үлэлээбит чугас киһитэ Климент Иванов уонна Хаҥалас улууһун баһылыга Сергей Гребнев тыл эттилэр.
Өктөмнөөҕү Ытык Троица храмыгар Дьокуускай уонна Ленскэй архиепискоба Роман Михаил Ефимович Николаев сырдык дууһатыгар аналлаах Божественнай литургияны уонна панихиданы толордо. Таҥара сулууспата икки тылынан — сыаркап-славянскай уонна саха тылынан ыытылынна.