«Биир ньыгыл Арассыыйа» баартыйа Саха сиринээҕи уопсастыбаннай өйөбүл ыстаабыгар алдьатыылаах халаан уутуттан эмсэҕэлээбит Дьааҥы улууһун олохтоохторугар анаммыт гуманитарнай көмө киирдэ. Бу үтүөнү оҥоруу аахсыйата Саха сирин норуоттарын икки ардыларынааҕы сомоҕолоһуутун уонна бэйэ-бэйэҕэ көмөлөсүһүүтүн чаҕылхай холобурунан буолла.
Бу көҕүлээһини өрөспүүбүлүкэ национальнай-култуурунай түмсүүлэрэ сэргээтилэр уонна күүскэ өйөөтүлэр. Ол курдук, көмөнү хомуйууга Ингуштар «Вайнах» национальнай-култуурунай түмүллүбүт кииннэрэ, «Саха Өрөспүүбүлүкэтин таджиктарын сойууһа» уопсастыбаннай тэрилтэ, Узбектар түмсүүлэрин Ыччат сэбиэтэ, «Баку» азербайджаннар түмсүүлэрэ, «Саха Өрөспүүбүлүкэтин армяннарын сойууһа» уонна «Кыргыз кэҥгириэһэ» кыттыыны ыллылар.
Улуус олохтоохторугар анаан ас-үөл, тус гигиена тэриллэрэ, таҥас-сап, тэллэх-суорҕан уонна бастакы наадалаах мал-сал хомулунна.
«Бу — өрөспүүбүлүкэ элбэх омуктаах норуота Дьааҥы олохтоохторугар көмөтө буолар, — диэн Саха Өрөспүүбүлүкэтин тас сибээскэ уонна норуоттар дьыалаларыгар миниистирин солбуйааччы Татьяна Пяткина бэлиэтээтэ. — Биһиги күүспүт — араас омук буоларбытыгар уонна үтүө санаабытыгар. Сүрэҕэ аһаҕас, амарах санаалаах хас биирдии киһиэхэ улахан махтал».
Көмөнү хомуйар пуун бу аахсыйаҕа кыттыһыан баҕалаах дьоҥҥо барыларыгар аһаҕас.
Гуманитарнай көмөнү тутар пуун үлэтин кэмэ уонна аадырыһа:
- Аадырыһа: Дьокуускай к., Курашов уул., 24 дь., 405 кэб.
- Бириэмэтэ: күн аайы, өрөбүлэ суох, сарсыарда 9:00 чаастан киэһэ 18:00 чааска диэри.
- Билсэр төлөпүөн: 8-914-220-64-16