Дьокуускайга «СибОйл» хампаанньа атырдьах ыйын 4 күнүттэн АИ-95 бэнсиини мобильнай сыһыарыы нөҥүө атыылыырын тохтотто.
Ол курдук, сарсын, атырдьах ыйын 5 күнүттэн, Окружной шоссеҕа баар соҕотох көҥүл атыылыыр АЗС-ка хааччах киириэҕэ. Бу туһунан ЯСИА-ҕа хампаанньа генеральнай дириэктэрэ Сергей Черных иһитиннэрдэ.
«Оптуорунньуктан АИ-95 бэнсиин бары АЗС-тарга уонна «СибОйл» мобильнай сыһыарыытыгар атыыланар кыаҕа суох буолар. Бэнсиин саппааһа хааччахтанарынан сибээстээн, Окружной шоссеҕа АИ-95 мааркалаах уматыгы кумааҕы харчынан уонна баан каартатынан атыылааһын эмиэ быстах кэмҥэ тохтотуллуоҕа. Уматыгы топливнай каартанан эрэ куттарыахха сөп буолуоҕа. Оттон АИ-92 уонна дизельнэй уматыкка билигин хааччах суох. Инникитин балаһыанньа хайдах буоларын этэр уустук. Бэйэбит эмиэ кэтэһэбит. Уматыктаах богуоннар хайдах кэлэллэриттэн тутулуктаах», – диэн Сергей Черных быһаарда.
Санатан эттэххэ, «СибОйл» от ыйын 29 күнүгэр Окружной шоссе 4-с километрыгар баар уматык кутар ыстаансыйаҕа бары көрүҥнээх уматыгы хааччаҕа суох атыылааһыны сөргүппүтэ.
Билиҥҥи кэмҥэ Саха сиригэр ОДьКХ уонна энергетика тэрилтэлэрин уматыгынан бигэтик хааччыйарга туһуламмыт дьаһаллар ылыллаллар. Оттон бу нэдиэлэҕэ былаас бэрэстэбиитэллэрэ Нерюнгри уонна Алдан улуустарыгар уматыгы кытта сибээстээх балаһыанньаны тэҥниир үлэни ыыталлара күүтүллэр.