Дьокуускай куорат суута сымыйанан регистрацияланан, судаарыстыбаттан 1,3 мөл. солкуобайтан тахса суумалаах оҕо босуобуйатын сокуоннайа суох ылбыт ийэлээх кыыска бириигэбэр таһаарда. Бу туһунан куорат суутун пресс-сулууспата иһитиннэрдэ.
1976 с.т. ийэ 2000 с.т. оҕолоох буолуохтаах кыыһа Арассыыйаҕа олорор дьиэтэ суоҕун уонна кыраныысса таһыгар олорорун билэрэ. Ол иһин оҕо төрөөтөҕүнэ социальнай төлөбүрдэри ылар сыалтан, кыыһыгар Дьокуускайга кэлэн сымыйанан пропискаланарыгар сүбэлээбит. Ол курдук, албын докумуоннары 2021 сыл ыам ыйыгар «Мин докумуоннарым» кииҥҥэ оҥорторбуттар.
2021 сыл бэс ыйыгар кыыс оҕоломмут уонна биирдэ бэриллэр босуобуйаҕа, оҕону көрүүгэ, кыамматтарга уонна эдэр дьиэ кэргэҥҥэ бэриллэр төлөбүрдэргэ сайабылыанньа биэрбит. Онтон 2024 сыл кулун тутарыгар иккис оҕотун төрөтөн баран, биир кэлим босуобуйаҕа сайабылыанньа суруйбут.
2021 сылтан 2024 сылга диэри дьахталлар олорор сирдэрин туһунан сымыйа дааннайдары ыйан, социальнай көмүскэл уорганнарыгар уонна Социальнай пуондаҕа хаста да сайабылыанньа биэрбиттэр. Бу кэм иһигэр кыыс бааҥҥа счетугар уопсайа 1 361 425,95 солкуобай киирбит. Онтон 1 282 624,63 солкуобайа — федеральнай бүддьүөттэн, оттон 78 801,32 солкуобайа — өрөспүүбүлүкэ бүддьүөтүттэн төлөммүт.
Суукка буруйданааччылар буруйдарын билиммиттэр, ол эрээри быһаарыы биэрэртэн батыммыттар. Суут кинилэр дьайыыларын эрдэттэн сүбэлэһэн, бөлөхтөөн олус улахан кээмэйдээх социальнай төлөбүрдэри албыннаан ылыыга быһаарда.
Суут уурааҕынан, кыыска 2 сыл уопсай эрэсиимнээх холуонньаҕа хаайыллар накаастабыл көрүлүннэ, ол эрээри оҕото 14 сааһын туолуор диэри болдьоҕо хойутатылынна. Оттон ийэ 2 сыл 6 ыйга көҥүлэ быһыллан, суут саалатыттан тута хаайыыга угулунна.
Социальнай көмүскэл уонна Социальнай пуонда гражданскай ирдэбиллэрэ толорулуннулар — сууттаммыт дьонтон уопсайа 1 361 425,95 солкуобай харчы бииргэ ирдэнэр буолла. Бириигэбэр сокуоннай күүһүгэр киирэ илик.