Саха сирин 535 олохтооҕо сыл бастакы аҥарыгар доруобуйаны чөлүгэр түһэрэр тиэхиньиичэскэй тэрили уларсыы өҥөтүнэн туһаммыт. Быстах кэмҥэ туһаналларыгар 584 тэрил бэриллибитэ диэн Социальнай хааччыйыы өрөспүүбүлүкэтээҕи комплекснай киинин үлэһиттэрэ иһитиннэрдилэр.
Өҥөнү оҥоруу Арассыыйа Бэрэсидьиэнэ Владимир Путин этиитинэн олоххо киирбит “Дьиэ кэргэн” национальнай бырайыак сыалыгар-соругар ону тэҥэ, “Биир ньыгыл Арассыыйа” баартыйа “Хас биирдии көмөнү эрэйээччигэ өйөбүл” норуот бырагырааматын салаатыгар эппиэттиир. Тэрилтэ чахчытынан, көмөнү 151 инбэлиит, икки инбэлиит оҕо, үс анал байыаннай дьайыы кыттыылааҕа, ону тэҥэ, 379 доруобуйаны чөлүгэр түһэрэр тиэхиньиичэскэй тэрилгэ наадыйар өрөспүүбүлүкэ олохтооҕо туһаммыт.
“Доруобуйаны чөлүгэр түһэрэр тиэхиньиичэскэй тэрили уларсар буолан харчыны биллэ кэмчилиэххэ сөп – кырата суох суумалаах саҥа тэрили ылбакка, уларсык ылыахха сөп. Социальнай хааччыйыы комплекснай киинигэр кириэһилэ-кэлээскэни уонна баттыгы хасыһын даҕаны уларыстым. Тиэхиньиичэскэй тэрили уларсыыга олус туһалаах уонна наадалаах бырагыраама. Инбэлиит дьоҥҥо судаарыстыба өйөбүлэ улахан суолталаах”, – диэн Дьокуускай куорат олохтооҕо Мария Попова кэпсиир.
Дьокуускай куоракка доруобуйаны чөлүгэр түһэрэр тиэхиньиичэскэй тэрили уларсар пуун 10-тан тахса сыл устата үлэлээтэ. Дьон быстах кэмҥэ туттарыгар инбэлииттэр кэлээскэлэрин, баттыгы, тирэҕирэн хаамар тэрили, сытар ыарыһах бааһырбаттарын туһугар анал матарааһы, сытар ыарыһахтары сууйар ваннаны уо.д.а. тэрили уларсаллар.
Сиһилии бу аадырыстан билсиҥ: Дьокуускай куорат, Пушкин уул., 31/1 нүөмэрдээх дьиэтэ (Киров уул. киириллэр) эбэтэр 40-21-78 төлөпүөнүнэн ыйыталаһыҥ. Бу туһунан Ил Дархан уонна Бырабыыталыстыба пресс-сулууспата суруйар.