RT (Russia Today) телеханаал «Восток» бөлөҕүн «Чир» позывнойдаах байыаһын хорсун быһыытын туһунан кэпсиир.
Кини анал байыаннай дьайыыга 2022 сыллаахха баҕа өттүнэн барбыт. Сэбиэскэй былаахтаах тахсыбыт эмээхсини Украина саллааттара атаҕастыылларын видеону көрөн баран: «Фроҥҥа барыахха наада!», — диэн быһаарыммыт. Байыаһы дьиэтигэр кэргэнэ уонна үс оҕото күүтэллэр.
Чир — улахан уопуттаах булчут. Онон саанан-саадаҕынан сатаан туттара олус туһалаабыт. Кинини тута снайперынан, онтон штурмовиктар бөлөхтөрүн хамандыырынан анаабыттар. Сулууспалыыр кэмигэр кини өстөөх уонунан дронун суулларбыт.
Соледар анныгар төгүрүктээһиҥҥэ түбэспит чугастааҕы подразделениелары быыһыыр эпэрээссийэҕэ хорсуннук сэриилэспит. Чир салайыытынан бөлөх төгүрүктээһини тоҕо көтөн, саллааттары биир да сүтүгэ суох тыыннаах таһаарбыт. Онно бэйэтин атаҕар ыар бааһырыыны ылбыт.
Эмтэнэн баран, инники күөҥҥэ суоппар буолан төннүбүт. Икки сылтан ордук кэмҥэ кыра таһаҕас тиэйэр массыынанан байыаннай сорудахтары толорор: байыаннай сэби-сэбиргэли (боеприпастары), аһы-үөлү таһар, бааһырбыт дьону эвакуациялыыр. Бииргэ сулууспалыыр дьоно саха уолун туох да куттаммат диэн ааттыыллар, тоҕо диэтэр кини мэлдьи саамай кутталлаах сирдэргэ сылдьар.
«Биир сорудахха кузовпар 200 киилэ байыаннай сэптээх-сэбиргэллээх (боеприпастаах) айаннаабытым. Өстөөх халлаантан снарядтары быраҕан хонуулары уматан, биһиги дьоммутугар барар суолу быспыта. Мин оччоҕо ол буораҕы кытта дэлби тэбэн халлааҥҥа көтүөхпүн сөп этэ, ол эрээри куттаммакка уот ортотунан тоҕо көтөн ааспытым. Массыына түргэниттэн көлөһө анныттан өрө турбут быыл уоттан быыһаабыта»,— диэн Чир кэпсиир.
Кини ол байыаннай сэби-сэбиргэли бириэмэтигэр тиэрдибит. Ол иһин билигин бэйэтин «буханкатын» күлэн «Чаҕылҕан» («Молния») диэн ааттыыр. Быйыл саас Запорожьеҕа Чир массыынатынан миинэҕэ хаптарбыт уонна бааһырбыт. Байыастар көмөлөрүттэн аккаастаммыт: атын дьон олоҕун кутталга уурбат туһуттан бэйэтэ эвакуацияланарга быһаарыммыт. Ол иһэн, ботуруоннара бүппүт икки бииргэ сулууспалыыр саллаатын көрсүбүт. Чиргэ бэйэтигэр биир эрэ бүтэһик ботуруон хаалбыт эбит. Төбөлөрүн үрдүнэн өстөөх дрона көтөн кэлбитигэр, саха снайпера ону биир бүтэһик ботуруонунан ытан суулларбыт.
Билигин АБДь-га Чир уола эмиэ сэриилэһэр. Кини аҕата бастакы бааһырыытын ылбытын кэннэ фроҥҥа барарга санаммыт.