Саҥа үөрэх дьылыгар Саха сирин орто профессиональнай үөрэхтээһинин тэрилтэлэригэр 28,7 тыһыынчаттан тахса устудьуон үөрэнэр. Каадырдары бэлэмнээһиҥҥэ 50 үөрэх тэрилтэтэ аҕыс сүрүн хайысханан 211 идэҕэ үөрэтэр. Устудьуоннар 70-ча бырыһыаннара өрөспүүбүлүкэ бүддьүөтүн суотугар үөрэнэр. Бу туһунан СӨ үөрэх министиэристибэтэ иһитиннэрэр.
—Бүгүн өрөспүүбүлүкэ орто анал үөрэхтээһинин систиэмэтэ 211 идэҕэ исписэлиистэри ситиһиилээхтик бэлэмниир. Испииһэк сыл аайы саҥардыллан, экэниэмикэ ирдэбилинэн уларыйан иһэр. Орто анал үөрэх (СПО) устудьуоннарын үксүлэрэ өрөспүүбүлүкэ бүддьүөтүн суотугар үөрэнэллэрэ улахан суолталаах. Биһиги бүгүн ыччаппыт сайдыытыгар, бэйэлэрин салайыныыларыгар бары усулуобуйаны тэрийэр эбээһинэстээхпит, — диэн СӨ ыччат дьыалатын уонна социальнай алтыһыытын миниистирэ Петр Шамаев бэлиэтээтэ.
Саха сиригэр СПО тиһигин сайыннарыы үлэтэ РФ Бэрэсидьиэнэ Владимир Путин көҕүлээбит «Молодёжь и дети» национальнай бырайыагын, ону тэҥэ «Биир ньыгыл Арассыыйа» норуодунай бырагырааматын «Новая школа» федеральнай бырайыагын чэрчитинэн ыытыллар.
—Биһиги үлэ биэрээччилэр үрдүк технологиялаах тэрилтэлэргэ ирдэнэр саҥа билиилэри, үөрүйэхтэри үлэһиттэр түргэнник ылыналларыгар үрдүк интэриэстээхтэрин көрөбүт. Бу соругу быһаарыыны эбии профессиональнай үөрэҕи сайыннарыынан хааччыйыахха сөп. Онуоха манна бүтүн систиэмэни болҕомтолоохтук, сатабыллаахтык хаттаан сөргүтүү наадатын тоһоҕолоон бэлиэтиибин, — диэн Владимир Путин тоһоҕолоон бэлиэтиир.
Стратегическай ориентирынан СӨ Ил Дархана Айсен Николаев «О развитии единой системы образования» ыйааҕа буолар.
—Экэниэмикэҕэ идэтийбит каадырдары бэлэмниир үлэни тус сыаллаах-соруктаах күүһүрдэбит. Үгүс сылларга профтех үөрэхтээһин материальнай-тэхиньиичэскэй баазата мөлтөҕө ыччат үлэһит идэтин таларыгар уустуктары үөскэтэрэ. Онуоха сыл аайы орто сүһүөх квалификациялаах каадырдар тиийбэттэрэ элбээн испитэ. Тэхиньиичэскэй каадырдар ирдэнэллэригэр билгэлээһини оҥорор наадата тирээбитигэр, 2025 сыл сэтинньитигэр парламент истиилэригэр болҕомто ууруллубута. Билигин Бырабыыталыстыба сэттэ сыллаах кадровай билгэлээһинэ тэриллэн, үлэ ырыынагар ордук наадалаах идэлэр биллэллэр уонна бу үлэ көхтөөхтүк салҕанар, — диэн Ил Дархан Айсен Николаев бэлиэтиир.
Владимир Винокуров, Дьокуускайдааҕы медицинскэй колледж «Лечебное дело» отделениетын бастакы кууруһун устудьуона орто профессиональнай үөрэҕи тоҕо талбытын кэпсээтэ.
—Мэлдьи үлэм чопчу түмүгүн көрүөхпүн баҕарарым. Мэдиссиинэ миэхэ, бастатан туран быраактыка. Колледжка итини үчүгэйдик үөрэтэллэр. Эбиитин орто үөрэххэ үөрэнии идэҕэ бэйэҥ суолгун эрдэ саҕалыырга кыаҕы биэрэр. Саастыылаахтарым университет 2-3 эрэ кууруһугар үөрэнэ сырыттахтарына, хайыы-үйэ дипломнаах, идэлээх буолуом. Нэһилиэнньэлээх пууннар икки ардылара олус ыраах, тырааныспар тиийэрэ уустук. Ыраах сэлиэнньэҕэ миэдик санавиация кэлиэр диэри бастакы көмөнү оҥорор киһи. Онон исписэлиистэр ханна баҕарар наадалар, — диэн санаатын үллэстэр.
2027 сыллаахха «Профессионалитет» федеральнай бырайыак чэрчитинэн Саха сиригэр энергетика, тырааныспар, тутуу, IT, электротехника, туризм уонна чэпчэки бырамыысыланнас хайысхаларынан сэттэ саҥа үөрэх кластера үлэтин саҕалыаҕа. Бу туһунан СӨ Ил Дарханын уонна Бырабыыталыстабытан пресс-сулууспата суруйар.
Сиһилии: https://www.sakha.gov.ru/news/61545