Горнай улууһун Бэрдьигэстээх нэһилиэгин олохтоохторо Надежда, Валерий Ивановтар хас быыбар ахсын сахалыы таҥналлар. Бу да сырыыга ити үтүө үгэстэрин кэспэтилэр.
Горнай улууһун норуотун маастара Надежда Афанасьевнаттан хаһааҥҥыттан уонна тоҕо сахалыы таҥнан тиийэн куоластыыр буолбуттарын, быыбар туох суолталааҕын туһунан ыйыталастым:
— 2018 сылтан тиһигин быспакка быыбарга сахалыы таҥастаах тиийэбит. Харантыын даҕаны кэмигэр мааскалаах, сахалыы таҥастаах баран куоластаабыппыт. Ол иннинээҕи сылларга эмиэ биирдиилээн, дэҥ кэриэтэ төрүт таҥаспытын кэтэрбит. Сахалыы таҥастаах тиийэн куоластааһын бу көннөрү симэнии, хаартыскаҕа түһүү эрэ буолбатах. Биһиги манан оҕолорбутугар, сиэннэрбитигэр, үүнэр көлүөнэҕэ быыбар суолтатын, киһи сокуонунан бырааба буоларын өйдөтөргө дьулуһабыт. Киһи сокуоннай сааһын ситтэ даҕаны инники олоҕор эппиэтинэһин, Саха сирэ, бүтүн дойду чэчирии сайдарыгар талар кыаҕын туоһулуур. Быыбар хас биирдии киһи кыһалҕатын быһаарар, интэриэһин көмүскүүр хандьыдааты, баартыйаны таларга эппиэтинэспитин көрдөрөр. Онон быыбарга кыттар, куоластыыр булгуччулаах эбээһинэспит.
Биһиги ыал биир даҕаны быыбары көтүтэ иликпит. Кэлин куоластааһын икки-үс күн ыытылларынан сибээстээн, арай, баран-кэлэн хааллахпытына сарсыныгар быыбардыахпытын сөп, — диэн санаатын үллэстэр.
Манна даҕатан эттэххэ, Надежда Иванова – СӨ доруобуйатын харыстабылын туйгуна, Саха Өрөспүүбүлүкэтин уус-уран оҥоһугун, Горнай улууһун норуотун маастара. Талааннаах Далбар Хотун сахалыы таҥастарын барытын бэйэтин илиитинэн баайан, тигэн, айан таһаарар.