Быйыл Саха сиригэр нэһилиэнньэлээх пууннары ыраастааһыҥҥа уонна тупсарыыга аналлаах өрөспүүбүлүкэтээҕи аахсыйа чэрчитинэн 5 244 субуотунньук ыытылынна. Манна барыта 106 452 киһи кытынна.
Ол түмүгүнэн 110 723 куб. бөх-сыыс таһаарылынна. Бу туһунан СӨ Экологияҕа министиэристибэтин үлэ түмүгүн таһаарар кэҥэтиллибит мунньаҕар иһитиннэрдилэр.
Нэһилиэнньэлээх пууннары ыраастааһыны тэрийэр хамыыһыйа эппиэттээх сэкирэтээрэ Михаил Андреев өрөспүүбүлүкэ олохтоохторо оҥорбут үлэлэрин бэлиэтээн эттэ. Ураты болҕомтону эдэр дьон көхтөөхтүк кыттыбыта тарта — кыттааччылартан аҥаара, ол эбэтэр 18-35 саастаах 52 975 киһи ыччаттар.
Тулалыыр эйгэни ыраастааһыны таһынан, өрөспүүбүлүкэҕэ көҕөрдүү үлэтэ эмиэ ыытылынна: 4 471 мас уонна 2 872 талах олордулунна. Көҥүлэ суох бөх тоҕор сирдэр ахсааннара икки төгүлтэн тахса аҕыйаата. Маны таһынан, 1 250 контейнер турар былаһаакката ирдэбилгэ эппиэттиир турукка киирдэ.
Субуотунньуктары тэрийиигэ Горнай, Таатта, Мэҥэ-Хаҥалас, Өймөкөөн уонна Абый улуустара бастыҥ көрдөрүүлээх буоллулар.
Михаил Андреев бэлиэтээбитинэн, Саха сиригэр атын да экологическэй көҕүлээһиннэр сайыннылар. Арассыыйа бэрэсидьиэнэ Владимир Путин көҕүлээһининэн олоххо киирэр «Экологическое благополучие» нацбырайыак чэрчитинэн, сыл саҥатыттан 3 528 тэрээһин ыытыллан, онно 127 954 киһи хабылынна. Манна «Вода России» уонна «Зеленый четверг диэн бүтүн Арассыыйатааҕы уонна өрөспүүбүлүкэтээҕи аахсыйалар улахан кылааттарын киллэрдилэр.
«Сыл түмүгэ көрдөрөрүнэн, гражданнар экология боппуруостарын быһаарыыга олус көхтөөхтүк кытталлар. Статистика көрдөрүүлэрэ арыый түспүттэрин үрдүнэн, көҥүлэ суох бөх тоҕор сирдэри суох оҥорууга уонна тупсарыыга тиһиктээхтик ыытыллар үлэ түмүктээх. Эһиилги сылга көрдөрүүбүтүн өссө тупсарар туһуттан, биһиги муниципалитеттар баһылыктарын кытта салгыы ситимнээхтик үлэлиэхпит», — диэн Михаил Андреев эттэ.
Ситиһиллибит түмүктэр — Саха сиригэр экологическэй этэҥҥэ буолууну хааччыйар стратегическай хайысханы олоххо киллэриигэ улахан суолталаах хардыынан буолар. Бу үлэ өрөспүүбүлүкэ Ил Дархана Айсен Николаев экологическай этэҥҥэ буолуу туһунан ыйааҕар олоҕуран ыытыллар. Бу ыйаах Хоту дойду ураты айылҕатын харыстааһыҥҥа, олорорго табыгастаах эйгэни тэрийиигэ уонна Саха сирин олохтоохторугар экологическай култуураны иҥэриигэ уһун болдьохтоох сыаллары-соруктары туруорар.