Горнай улууһун Атамай нэһилиэгин сынньалаҥ киинигэр «Махтанабыт Эһиэхэ» диэн учууталларга, уонна оскуола иннинээҕи үөрэхтээһин идэлээх үлэһиттэригэр, ону тэҥэ Култуура сылын үлэтин арыллыытыгар анаммыт эҕэрдэ кэнсиэр ыытылынна.
«Учуутал, Иитээччи!» — үйэлээх үтүө үлэтэ олоххо уһуйар, дьоһуннаах дьарыккытын киһи кэрэхсиир, убаастыыр улуу үлэтэ буолар. Хас биирдии оҕоҕут кэскилэ киһи буолан тахсара эһиги кыһамньыгытынан тутулуктаах.
Дьоро күн Атамай орто оскуолатын дириэктэрэ Матрена Ефремова Горнай улууһун «Үлэ күүһэ» эрэдээксийэтэ (сал. Күннэй Алексеева) «Педагоги Горного улуса» таһаарбыт кинигэтин орто оскуола бэтэрээн үлэһиттэригэр үөрүүлээх быһыыга-майгыга туттарда.
Атамай нэһилиэгин «Радуга» уһуйаан тэрилтэтин Идэлээх сойуустарын бэрэссэдээтэлэ Надежда Адамова уһуйаан бары үлэһиттэрин идэлээх бырааһынньыктарынан эҕэрдэлээтэ. Бу күн итии-истиҥ эҕэрдэ тыллар кынаттыы көттүлэр, күн сардаҥатын курдук сырдаттылар.
Эҕэрдэ кэнсиэри ылбаҕай ырыа доҕуһуоллаах, имигэс көтө-дайа үҥкүүлээх «Радуга» уһуйаан (сал. Юлиана Аввакумова) Атамай орто оскуолатын (сал. Матрена Ефремова) нэһилиэк ыччат түмсүүтэ бырааһынньыктааҕы кэнсиэри киэргэттилэр, кэлбит дьон хас биирдии нүөмэр кэнсиэр кыттыылаахтарыгар «браво» диэн дохсун ытыс доҕуһуоллаах сэргээтилэр. Ити, курдук кэрэ эйгэтигэр уйдаран, үөрүү-көтүү уктэллээх дьиэбитигэр тарҕастыбыт.
Валентина Яковлева.