Арассыыйа артыыһа Юра Борисов саха режиссера Владимир Мункуев киинэтигэр уһуллуоҕа. Биһиги режиссербут Владимир Мункуев «Кыһыҥҥы суол» диэн историческай драманы уһуларга бэлэмнэнэр.
Манна сүрүн оруолу Арассыыйа артыыһа Юра Борисов толоруоҕа, оттон генерал Анатолий Пепеляев оруолун Григорий Добрыгиҥҥа сүктэрэр былааннаахтар.
Киинэ ис хоһооно 1922–1923 сылларга Саха сиригэр Гражданскай сэрии кэмигэр буолбут дьиҥнээх түбэлтэлэргэ олоҕурар. Сүрүн дьайыылар үрүҥ генерал Анатолий Пепеляев сэриилэрэ Саха сиригэр сатамматах киириилэрин кэнниттэн кинини сууттааһын бырасыаһын тула кэпсэниэхтэрэ. Саҥа киинэ биһиги устуоруйабыт ыар түгэннэрин эрэ буолбакка, киһи аймах үйэлээх сыаннастарын — аһыныгас быһыыны, дьоһуннаах буолууну уонна кытаанах утарыта туруу усулуобуйатыгар даҕаны киһилии майгыны сүтэрбэти кэпсиэҕэ.
«Бу бырайыакка бэлэмнэнии үлэтэ хайыы-үйэ биэс сыл кэриҥэ салҕанар. Киинэни кыһын Саха сиригэр уһулар былааннаахтар, оттон премьерата 2028 сылга болдьонор. Саха сирин устуоруйата талааннаах режиссердары уонна биллиилээх артыыстары түмэр улахан киинэ бырайыактарын төрүөтэ буолара биһиэхэ олус күндү уонна суолталаах. Бу — биһиги өрөспүүбүлүкэбитигэр, баай устуоруйатыгар уонна айар кыаҕыгар интэриэс улаатан иһэрин өссө биир туоһута буолар. Владимир Мункуевка уонна уһулар бөлөххөсанааларын ситиһиилээхтик олоххо киллэрэллэригэр баҕарабын!, — диэн Култуура миниистирэ Афанасий Ноев иһитиннэрдэ.
