Ил Түмэн кэлэр үс сыл устатыгар үлэлиэхтээх өрөспүүбүлүкэ бүддьүөтүн бастакы ааҕыыга ылынна. Ол туһунан парламент бэрэссэдээтэлэ Алексей Еремеев тус санаатын үллэһиннэ.
— Бүгүн бүддьүөт сокуона бастакы ааҕыыга ааста. Мин сэрэхтээхтик да буоллар, эрэллээхтик сыһыаннаһабын. Бүддьүөт кээмэйэ былырыыҥҥыны кытта тэҥнээтэххэ, дохуот да, ороскуот да өттүнэн быдан ордук диэххэ сөп. Холобур, хомунаалынай комплексы ыллахха, кэнники сыллары кытта тэҥнээтэххэ, аан бастаан 56 миллиард солкуобайдаах ирдэнэр сууманы толору уктубут. Биллэн турар, хомунаалынай комплексы ситэ үбүлээбэтэхпитинэ, Саха сирин сүрүн тэрилтэлэрэ эмсэҕэлииллэр. Ол эрээри социальнай ситимнэргэ, сорох СМИ-лэргэ тыа хаһаайыстыбатыгар, эмтээһиҥҥэ, авиа таһыыларга, Арктика улуустарыгар иһинээҕи көтүүлэргэ, санитарнай авиацияҕа уо.д.а. үп угуллубат диэн дьону долгутар иһитиннэриилэр тахсаллар. Ол эрээри бу бастакы эрэ ааҕыы буолар. Бастакы ааҕыыга судаарыстыба бүддьүөтүн дохуоттаах чааһа өссө ситэ быһаарылла илик, тоҕо диэтэххэ, бүддьүөт быраабылатын быһыытынан, иккис ааҕыыга бүддьүөт дотацията, субвенция, субсидия, федеральнай бүддьүөттэн атын киириилэр, нолуоктан киириилэр дьэ учуоттаныахтаахтар. Ол иһин бу ыстатыйалар булгуччу, хайаан да туолуохтара. Уопсайынан, мин этиэхпин баҕарабын, билигин парламеҥҥа бүддьүөтү оҥоруу күүстээх үлэтэ саҕаланна. Сөбүлэһэр хамыыһыйалар өрөспүүбүлүкэ ситэриилээх былааһын уорганнарын кытта тэриллиэхтэрэ уонна биһиги, норуот талбыт дьокутааттара, быыбардааччыларбыт бырааптарын көмүскүөхтээхпит. Биһиги биир санааҕа кэлэн, өрөспүүбүлүкэ судаарыстыбаннай бүддьүөтүн ылыныахпыт. Саамай сүрүнэ – биһиги саҥа сылы ылыллыбыт судаарыстыбаннай бүддьүөттээх көрсүөхпүт. Бу сүҥкэн, кичэллээх үлэ түмүгэ: бүгүҥҥү күҥҥэ диэри хамыыһыйалар тохтоло суох үлэлээтилэр. Бырабыыталыстыбаны кытта бүддьүөт кэмитиэтэ күн аайы мунньахтыыр. Биһиги, норуот талбыт дьокутааттара, быыбардааччыларбыт бырааптарын туруулаһан, кэлэр сыллааҕы бүддьүөтү ылыныахтаахпыт.