РФ бэрэсидьиэнэ Владимир Путин көҕүлүүр “Уһун уонна көхтөөх олох” национальнай бырайыагы олоххо киллэрии чэрчитинэн, алтынньы 22 күнүгэр Уус Алдан улууһун Бэйдиҥэ сэлиэнньэтигэр быраас амбулаторията аһылынна.
Үөрүүлээх тэрээһиҥҥэ Ил Дархан Айсен Николаев видео-сибээһинэн кыттан, Бэйдиҥэ олохтоохторун уонна быраас амбулаториятын үлэһиттэрин эҕэрдэлээтэ.
Ону сэргэ биир дойдулаахтарын улуус баһылыга Василий Алексеев, Бэйдиҥэ сэлиэнньэтин баһылыга Константин Алексеев, Оройуоннааҕы киин балыыһа кылаабынай бырааһа Сергей Черкашин, быраас амбулаториятын сэбиэдиссэйэ, терапевт-быраас Күннэй Винокурова эҕэрдэлээтилэр уонна кыһыл лиэнтэни быстылар.
Бэйдиҥэтээҕи толору хааччыллыылаах быраас амбулаториятыгар аптыака пууна, быраас уонна биэлсэр кэбиниэттэрэ, күнүс эмтэнэргэ 2 куойкалаах балаата, быһыы уонна укуол ылар кэбиниэттэр, эми-тому харайар хос бааллар.
«Быраас амбулаторията нэһилиэнньэҕэ мэдиссиинэ өҥөтүн табыгастаах оҥорорго көмөлөһүөҕэ. Кэрэхсэбиллээҕэ диэн, бүгүн быраас амбулаториятыгар Саха сирин доруобуйатын харыстабылын сайдыытыгар улахан кылаатын киллэрбит уһулуччулаах учуонай Петр Желобцов аата иҥэрилиннэ. Петр Маркович Бэйдиҥэ сэлиэнньэтиттэн төрүттээҕэ”, — диэн Сергей Черкашин үөрүүлээх сонуну иһитиннэрдэ.
Саҥа эбийиэги арыйыы сиэригэр-туомугар Петр Маркович аймахтара уонна биир идэлээхтэрэ кытыннылар.
Бу күн махтал тыллары тутааччыларга эттилэр, оттон быраас амбулаториятын үлэһиттэригэр үлэҕэ-хамнаска ситиһиилэри баҕардылар.
