АХШ бэрэсидьиэнэ Дональд Трамп эйэлэһии сөбүлэҥэ суоҕунан сибээстээн, Украина уонна Арассыыйа утары 200%-наах таможня пошлиналарын киллэриэн сөбүн иһитиннэрдэ. Бу туһунан бэрэсидьиэн бэйэтин өйөөччүлэрин иннигэр тыл этэригэр эттэ.
«Пошлиналар биһиги аҕыс мөккүөрү тохтоторбутугар көмөлөспүттэрэ. Баҕар, биһиги бу ньыманы Арассыыйаҕа уонна Украинаҕа тутатына туһаныахпытын наада буолуо», — диэн Дональд Трамп быыбар иннинээҕи миитин кэмигэр эттэ. Кини бу иннинэ маны толкуйдаабатаҕын бэлиэтээтэ. Ону тэҥэ, АХШ лидерэ ити ньыма туһата суох буолуон сөбүн эмиэ билиннэ, тоҕо диэтэххэ Америка ити дойдулартан олус аҕыйах кээмэйдээх табаары атыылаһар.
Трамп дуоһунаска киириэҕиттэн аҕыс мөккүөрү тохтоппутугар эрэллээх. Үрүҥ дьиэ тохтоппут мөккүөрдэринэн манныктары ааҕаллар: Армения уонна Азербайджан, Таиланд уонна Камбоджа, Израиль уонна Иран, Израиль уонна ХАМАС, Руанда уонна Конго Демократическай Өрөспүүбүлүкэтэ, Индия уонна Пакистан, Сербия уонна Косово, Египет уонна Эфиопия икки ардыларынааҕы утарыта киирсиилэрэ.
Бу иннинэ Дональд Трамп Украина мөккүөрүн быһаарыы үлэтэ түргэнник барарын туһунан эппитэ уонна Арассыыйаны кытта сибээс, ону тэҥэ атын кыттааччылары кытта кэпсэтиилэр баалларынан быһаарбыта. АХШ бэрэстэбиитэллэрэ алтынньы 9 күнүгэр Майамига Украина дэлэгээссийэтин уонна Европа бэрэстэбиитэллэрин кытта мөккүөрү тохтотууга саҥа этиилэри дьүүллэспиттэрэ.