Дьокуускай куоракка Ис дьыала управлениетын 1 №-дээх полиция отделын дьуһуурунай чааһыгар олохтоох дьахтартан сайабылыанньа киирбит. Ол курдук, биир киһи кинини албыннаан 40 тыһыынча солкуобайын уорбут.
Суһал-ирдиир үлэ кэмигэр холуобунай ирдэбил үлэһиттэрэ сибээс сириэстибэлэринэн уонна интэриниэтинэн туһанан оҥоһуллар хоромньулары арыйар отдел сотрудниктарын кытта буруйдааҕы — Таатта улууһуттан төрүттээх, урут сууттана сылдьыбыт 30 саастаах киһини булбуттар.
Быһаарыллыбытынан, уорбаланааччы билэр киһитин кытары арыгылаабыт. Ол олорон киниттэн харчылаах саастаах дьахтар баарын туһунан истибит. Уорбаланааччы кини төлөпүөнүн нүөмэрин ылан, мессенджер нөҥүө суруйан, Таатта улууһун учуутал дьахтарабын диэн бэйэтин билиһиннэрбит.
Кэпсэтии кэмигэр кини олоҕор ыарахаттары көрсүбүтүн уонна тус кыһалҕаларын туһунан кэпсээн, аһыныгас санаалаах эмээхсиҥҥэ аһыннаран, биир күн иһигэр кинини итэҕэтэн, 40 тыһыынча солкуобайы ыыттарбыт.
Арассыыйа Федерациятын Холуобунай кодексатын 159 ыст. 2 ч. олоҕуран, холуобунай дьыала көбүтүллүбүт. Бу ыстатыйанан 5 сылга диэри көҥүлү быһыы накаастабыла көрүллэр.