Алтынньы 30 күнүгэр Горнай улууһун Бэрдьигэстээх сэлиэнньэтигэр «Олоҥхо сирин талааннара — 2026» өрөспүүбүлүкэтээҕи бэстибээл үрдүк таһымнаахтык ыытылынна.
Бу кэрэ-бэлиэ тэрээһиҥҥэ Дьокуускайтан Арассыыйа үтүөлээх артыыһа Афанасий Афанасьевич уонна Саха Өрөспүүбүлүкэтин үтүөлээх артыыската Зоя Михайловна Соловьевтар салайар «Саха сирин бриллианнара» оҕо үҥкүү образцовай тыйаатыра ситиһиилээхтик кыттан, хас да үрдүк наҕарааданы тутта.
Ол курдук, оскуола иннинээҕи саастаах «Кокетки» бөлөх кыргыттара узбекскай үҥкүүнү бэрт кыһамньылаахтык толорон, I истиэпэннээх лауреат үрдүк аатын ыллылар.
Кинилэри кытта тэҥҥэ “Божьи коровки” бөлөх оҕолоро сахалыы үҥкүүнү ураннык көрдөрөн, эмиэ I истиэпэннээх лауреат үрдүк таһымын ситистилэр.
Хотугу үҥкүүнү чаҕылхайдык толорбут Ю Аиша уонна Ю Эрик дуэттара бэстибээл дьүүллүүр сүбэтин сөхтөрөн, эмиэ I истиэпэннээх лауреат аатын ылары ситистилэр.
Оҕолор кыра саастарыттан улахан сыанаҕа үҥкүүлүүллэр. Ол эрээри аан бастаан сыанаҕа тахсыбыт, долгуйбут оҕолор эмиэ бааллар. Төһө да долгуйдаллар, кырачаан артыыстар бары тэҥҥэ кыһаллан, үлэлэрин көрдөрөн, бары бастакы миэстэлэри ылары ситистилэр.
Оҕолору бэстибээлгэ хореограф Айталина Унарова салайан илдьэ сырытта. Төрөппүттэр уонна иитиллээччилэр Айталина Михайловнаҕа кэрэҕэ уһуйар бэриниилээх үлэтин иһин истиҥ махталларын тиэрдэллэр.
Кудриновтар дьиэ кэргэн: үҥкүү — олохпут үгэһэ
Светлана Кудринова — бөлөх куратора, элбэх оҕолоох ийэ. Билигин төрдүс оҕотун күүтэр, оҕолорун дьарыгын куруук өйүүр. Кини 5 саастаах кыыһа Настя уонна улахан уола Вадим бу ансаамбылга кыра эрдэхтэриттэн сылдьаллар.
— Светлана, Настя үҥкүүнэн хас сааһыттан дьарыктанарый?
— Кыыһым үс сааһыттан үҥкүүлүүр. Маҥнай сыанаҕа тахсарыгар ытаан тахсыбатаҕа, кэлин куттаммат буолбута. Үҥкүүнү наһаа сөбүлүүр — хомойдоҕуна дьиэтигэр кэлэн үҥкүүлээтэҕинэ санаата көнөр. Убайа Вадим эмиэ «Божьи коровки» бөлөххө үҥкүүлүүр.
— Оҕолоруҥ талааннаахтарын хайдах билбиккиний?
— Бэйэм кыра сылдьан үҥкүү уонна ырыа ансаамбылыгар сылдьыбытым. Оҕолорум кыра эрдэхтэриттэн музыканы иһиттилэр да, тэтимигэр сөп түбэһиннэрэн хамсанан бараллара, ол иһин үҥкүүгэ дьоҕурдаахтар диэн өйдөөбүтүм. Настялаах Вадим араас таһымнаах үгүс ситиһиилээхтэр.
— Оҕолоруҥ үҥкүүгэ бэриниилээхтэрин хайдах көрдөрбүттэрэй?
— Дьокуускайга куонкурус буолар күнүгэр Настя ыалдьан хаалбыта. Мин хаалыах диэбиппэр, «суох, үҥкүүлүөхпүн баҕарабын» диэн туран эмп иһэн сыанаҕа тахсыбыта, олус бэркэ үҥкүүлээбитэ. Вадим эмиэ дьиҥнээх үҥкүүһүт. Соторутааҕыта балыыһаттан тахсан ситэ чөлүгэр түһэ илик да буоллар, бэҕэһээ Бэрдьигэстээххэ «Бриллиантовые нотки» куонкурска «хайаан да барабын» диэн туран кыттыбыта. Үҥкүү оҕолору бэрээдэктиир, тулуурдаах буолууга үөрэтэр уонна биһиги дьиэ кэргэҥҥэ улахан үөрүүнү аҕалар.
Оннук да буоллаҕа. Төһө да сыанаҕа киириэх иннинэ кырачаан тарбахтар долгуйан титирэстээтэллэр, софит уоттара күндээрэ түстүлэр да, туох барыта умнуллар… Бу ситиһиилэр барыта төрөппүт уонна оҕо күннэтэ көрсөр сыралаах үлэлэрин, сыана кэтэҕэр хаалбыт ийэ уонна дьиэ кэргэн күүстээх өйөбүллэрин түмүгэ буолар.
Маннык тэрээһиннэр оҕо сайдыытыгар улахан сабыдыалы оҥороллор. Саха омук үҥкүүтүн уран хамсаныыта, хотугу сир ураты тыыннаах үҥкүүлэрэ, атын омуктар эгэлгэ култууралара оҕо дууһатын байыталлар, айар үлэҕэ угуйаллар. Оттон үҥкүү тулуурга, бэйэҕэ эрэллээх буоларга иитэр, олоххо бэлэмниир күүстээх оскуоланан буолар.
Чэмэлиинэ Скрябина.