Үөһээ Бүлүү улууһун Туобуйа нэһилиэгэр Аан дойду дьахталларын күнүгэр, уһуйаан кырачаан кыргыттарыгар уонна оскуола алын кылаас кыргыттарыгар аналлаах «Талаан уонна кэрэ эйгэтэ» күөн күрэс ыытылынна.
Күрэскэ кэрэ-мааны 8 кыыс биэс түһүмэххэ кытынна. Кэрэчээн сибэкки кыргыттарбыт төрүт саха таҥаһын кэтэн, чобуо куоластарынан уу сахалыы кимтэн кииннээх, хантан хааннаах кыыс оҕо буолалларын билиһиннэрдилэр. Иккис түһүмэххэ кыргыттар хоһоон аахтылар. Үһүс түһүмэххэ, Арассыыйаҕа Сомоҕолоһуу сылынан, кэрэчээн куоларбыт араас норуоттар таҥастарын көрдөрдүлэр. Төрдүс түһүмэххэ, кыргыттарбыт бэйэлэрин талааннарын көрдөрөн, ыллаан эйээрдилэр, үҥкүүлээн тэйдилэр. Бэһис, бүтэһик түһүмэххэ, сибэкки кэриэтэ симэнэн, мааны былааччыйа кэтэн киэргэнэн, кыталык курдук нарыннык, кыраһыабайдык кынталдьыйа, долгулдьуйа хаамтылар.
Бу киэһэ биһиги кырачаан кыргыттарбытын сөҕө-махтайа көрдүбүт. Мааны таҥаһы кэтэн, бэрт имигэстик туттан-хаптан, дьоһуннаахтык хамсанан, лыах курдук эргичийэн, мичилийэн сыанаҕа тахса үөрэммиттэрин көрөн астынныбыт, үөрдүбүт. Кырдьык да «кыыс оҕо – күн айбыт, анаабыт оҕото» буоларын дакаастаатылар. Сааскы сырдык күҥҥэ кэрэ кыргыттарбыт биһиги харахпытын сымнаттылар, сүрэхпитин сылаанньыттылар, сүргэбитин көтөхтүлэр.
Күрэскэ бастакы бөлөххө – уһуйаан саастаах кыргыттарга «Сандаара -2026» ааты 6 саастаах Милана Лукина, «Мичийээнэ-2026» ааты 4 саастаах Санита Белолюбская, «Кырачаан кыттааччы» ааты, күрэс саамай кыра кыттааччыта 3 саастаах Бэлла Петрова ыллылар. «Талаан уонна кэрэ эйгэтэ» күөн күрэс «Гран-при-2026» үрдүк ааты 6 саастаах Марьяна Николаева, иккис бөлөххө – оскуола саастаах алын кылаас кыргыттарыгар «Сандаара -2026» ааты 9 саастаах, 2-с кылаас үөрэнээччитэ Анисия Петрова ыллылар. Онтон «Мичийэ-2026» аат 7 саастаах, 1-гы кылаас үөрэнээччитигэр Амелия Шулякка, «Кэрэчээнэ-2026» аат 8 саастаах, 3-с кылаас үөрэнээччитигэр Карина Кузьминаҕа, «Талаан уонна кэрэ эйгэтэ» күөн күрэс үрдүк «Гран-при-2026» аат 7 саастаах, 1-гы кылаас үөрэнээччитигэр Теона Смеловаҕа иҥэрилиннэ. Күрэскэ «Көрөөччү биһирэбилэ» анал бирииһи бастакы бөлөххө Бэлла Петрова уонна иккис бөлөххө Теона Смелова ылан үөрдүлэр-көттүлэр.
Хас биирдии кыттааччы анал бирииһи туттулар уонна лиэнтэни кэттилэр. Онтон «Гран-при-2026» кыайыылаахтара анал лиэнтэни кытары хоруона кэттилэр. Түмүккэ бу күрэххэ кыттыбыт оҕолордоох күн күбэй ийэлэри бырааһынньыгынан эҕэрдэлээн уонна махтанан туран сибэкки дьөрбөтүн туттардылар.
Зинаида Абрамова,
Туобуйатааҕы «Сайдам» сынньалаҥ киинин уус-уран салайааччыта