Ийэҕэ анаммыт араас тэрээһиннэр биир бырааһынньыктааҕы күн эрэ буолбакка, сылы быһа ыытыллаллар.
Быйыл күһүн Амма улууһун Бөтүҥ нэһилиэгэр Ийэ искибиэригэр биир олус кэрэхсэбиллээх эбийиэги оҥорон туруордулар. Бу туһунан Амма улууһун Бөтүҥ нэһилиэгин Бочуоттаах олохтооҕо, “Амма киэҥ туттуута” туһаайыы бэлиэ хаһаайката, СӨ үөрэҕириитин туйгуна, Удьуор учууталлар (педагогическай династия) утумнааччыта, «Бөтүҥ Түмсүү» салайааччытынан үлэлээбит, “Алмаз” социальнай тэрилтэ клиническэй уйулҕаһыта Тамара Егорова маннык кэпсиир:
— 1996 сыллаахха “20-с үйэҕэ «Тымтык сааһым Тыымпыта» диэн психо-автобиографическай ыстатыйаны «Далбар Хотун» сурунаалга суруйан ийэбин Пономарева Мария Борисовнаны үйэтиппитим. Оччолорго Дьахтар күнүттэн ураты ийэлэргэ диэн чуолаан бырааһынньык баарын өйдөөбөппүн. Онно ордук Амма уонна Бүлүү улуустарын дьахталларырн ураты олохторун, сыһыаннарын арыйан суруйбутум.
Эһиил ийэбит 100 сааһын көрсө Бүлүү улууһун Тоҕус аҕыс кылааһыгар бииргэ үөрэммит доҕотторум ыыппыт үптэринэн уонна сиэннэрбит көмөлөрүнэн күн күбэй ийэбитигэр Маайаҕа, эбээбитигэр Аанаҕа, эдьиийбитигэр Кэтириискэ аналлаах “Үс кут” ыскамыайка күн сирин көрдө.
“Мистиката” диэн Бөтүҥҥэ С.Е. Николаева аатынан Ийэ искибиэригэр Тыымпы бэйиэтин Родион Еремеев хоһооно көмүс буукубунан суруллан турар. Онон ийэбин ситимниир бу икки нэһилиэк Ийэ искибиэригэр устуоруйаҕа киирбит курдуктар. Аҕабыт олохтон барбытын кэннэ ийэбит Бүлүү Тыымпытыгар улахан кыыһыгар Аанчыкка көһөн тиийэн, икки сыл буолаат, өбүгэлэригэр айаннаабыта. Саас буолан, оччолорго Бүлүү суола-ииһэ мөлтөх этэ, онон кыайан дойдутун булларбатахпыт. Мин бырааппынаан оскуола оҕолоро этибит, күтүөт барахсан Д.А. Солдатов ийэбит көмүс уҥуоҕун Тыымпы Бүкээттэ алааһыгар харайбыта. Ийэм өрүү «Дойдугутугар төннөөрүҥ» диирэ бу баар курдук. Онон хайаан да Тыымпыга ийэбит иккис дойдутун кытта ситим баарын сыаналаан бу искибиэргэ Амма сардаанатын үүннэрэн олуһун диэн дуоһуйдубут, уоскуйдубут.
Тыымпыттан төрүттээх Аскалон Павлов «Ийэккээм» диэн ырыата биһиги дьиэҕэ анаммыт курдук. Аскалон ийэтэ Маайыскалыын, сып-сылаас Далбардыын, биһиги ийэбит Маайа алтыһаллара. Иккиэн даҕаны Маайалар этилэр. Оһоҕос түгэҕинээҕи оҕото киһи сүрэҕин кылын таарыйар ырыатын айбыт эбит. Ийэ сүтүктээх оҕолорго сүрэхпит баастаах дьоҥҥо уйулҕаны уйадытар, долгуннуран долгутар ыра эбит…
Мин төрөөбүт күммэр — өйдөбүнньүк Сардаана үүммүт күнүгэр төрөппүттэрим тапталынан ахтыллыбыттара, кэрэ кэпсээн күлүмүрдээбитэ. Онно дьонум мааны майгылара, ыалдьытымсах быһыылара, истиҥ иэйиинэн амарах кэпсээн буолан үйэтитиллибиттэрэ.
... Ити курдук Ийэлэр искибиэрдэригэр “Үс кут” ыскамыайка курдук, ийэҕэ анаммыт Мэҥэ өйдөбүнньүк элбии турдун!