Кулун тутар 1 күнүгэр өрөбүллээҕи Оһуокайбыт Амма улууһун Оһуокайыгар ананна. Амматтан анаан-минээн Ф.Потапов аатынан норуот айымньытын киинин специалиһа, улуустааҕы «Оһуокай» түмсүүтүн салайааччыта Анфиса Алексеевна Федорова салайааччылаах этээччилэр киирдилэр.
Аммаҕа үүммүт сэлиэһинэй бурдугунан оҥоһуллубут алаадьынан, лэппиэскэнэн кэлбит дьону айах тутан эҕэрдэлээтилэр. Бастакынан аммалыы Оһуокайы Ромина Федорова саҕалаата. Кини кэнниттэн СР культуратын үтүөлээх үлэһитэ, үтүөлээх этээччитэ, Ил Дархан Оһуокайга стипендиата Александра Артемьева, 86 саастаах үтүөлээх этээччи Василисса Винокурова, эдэр этээччи Надя Дьяконова, о.д.а. эттилэр.Оһуокай быыһыгар ырыаһыттар ыллаатылар. Биир дойдулаахтарын урукку өттүгэр Амма улууһугар культура управлениетын начальнигынан үлэлээбит, билигин республикатааҕы норуот айымньытын киинин генеральнай директора Иван Иванов, «Саха сирэ» хаһыат редактора А.Тарасов эҕэрдэлээтилэр. Александр Тарасов Оһуокай түмсүү салайааччыта Александр Джурович үһүс сылын Оһуокай бэтэрээннэригэр хаһыакка суруттарар үтүө үгэстээҕин бэлиэтээтэ.
Бүлүүттэн, Дьөккөнтөн норуот эмчитэ Федот Иванов-Дьөккөн Сөдүөтэ «Оһуокай» түмсүүтэ норуоту сомоҕолуурга алгыстаах Оһуокайы тэрийэрин биһириирин үллэһиннэ.
Марта Николаева