Олунньу 24 күнүгэр Москваҕа Федерация сэбиэтигэр Арассыыйа Дьоруойа Сергей Ефремов аатынан “Время смыслов” аныгы былакаат ускуустубатын Бүтүн Арассыыйтааҕы куонкуруһун чэрчитинэн быыстапка арылынна.
2025 сыл алтынньытыгар РФ бырабыыталыстыбатын бэрэссэдээтэлин солбуйааччы – Уһук Илиҥҥи федеральнай уокурукка РФ бэрэсидьиэнин боломуочуйалаах бэрэстэбиитэлэ Юрий Трутнев куонкурус иккис сезона саҕаламмытын биллэрбитэ. Быыстапкаҕа турбут 30-тан тахса үлэттэн хас биирдиилэрэ араас социальнай-патриотическай тиэмэни сырдатар.
-“Патриотизм”, “Дойдуну көмүскээһин” диэн тыллар биһиги үлэбит туһалааҕын өйдүүргэ суолталарынан олус чугастар. Кэбиниэккэ эрэ олорон, дойдугун таптаабаккын. Эн төрөөбүт дойдугун көмүскүүр наадатын өйдүөхтээххин, наада буоллаҕына көмүскүөхтээххин. Өскөтүн эн байыаннай дьайыыттан кэллэххинэ, эн үлэҕэр-хамнаскар дьон ханнык да сэмэтэ суох буоларын курдук үлэлиэхтээххин. Биһиги байыаннай дьайыыттан кэлбит дьоммутугар эрэнэбит. Кинилэр Уһук Илин сайдыытыгар бэйэлэрин улахан кылааттарын киллэрэллэригэр эрэнэбит, — диэтэ Юрий Трутнев.
Куонкурус “Тигр” этэрээт номоххо киирбит хамандыыра, Приморье кыраайын ис бэлиитикэҕэ вице-губернатора, Арассыыйа Дьоруойа, Курскай уобалаһы босхолооһуҥҥа өлбүт Сергей Викторович Ефремов аатынан ааттаммыт.
Быыстапкаҕа дойду араас эрэгийиэниттэн, ол иһигэр РФ Уһук Илиҥҥи субъектарыттан, кыттааччылар үлэлэрэ туруоруллубут.
Бырайыак саҥа көлүөнэ ааптардарын санааларын этэллэригэр дьоһуннаах былаһаакканан буолар.
Куонкурус иккис сезонун чэрчитинэн, тэрийэр кэмитиэккэ икки тыһыынчаттан тахса үлэни ыыттылар. Үлэлэри олунньу 28 күнүгэр диэри туталлар.
Куонкуруска “Биһиги Кыайыыбыт”, “СВОи”, “Дьиэ кэргэн”, «Дети VS Киберугрозы», «Независимость, равенство, дружба!» номинацияларга кыттыахха сөп. Сүрүн номинациялары сэргэ бу сезоҥҥа үс анал трек киирэн биэрдэ.
ВШЭ бэрэпиэссэрэ, «Политджойстик» иһитиннэрэр-ырытар ханаал ааптара, “Время смыслов” куонкурус дьүүллүүр сүбэтин чилиэнэ Марат Баширов: “Биһиги истэр тылларбыты кэм-кэрдии суурайыа, оттон былакааттар хаалаллар. Уонунан сыллар да кэннилэриттэн биһиги сиэннэрбит уонна хос сиэннэрбит былакааттары көрөн, оччотооҕу кэм тыынын ылыахтара уонна дойду хайдах олорбутун өйдүөхтэрэ. Ол иһин, бу үлэлэри харыстааһын уонна төһө кыалларынан киэҥ аудиторияҕа көрдөрүү улахан суолталаах”, — диэн былакаат ускуустубатын ураты оруолун бэлиэтээтэ.
Куонкурус 13 номинациятыттан хас биирдиилэригэр харчынан бириэмийэлээх үс бириистээх миэстэ быһаарыллыаҕа. 10-16 саастаах эдэр ааптардарга, үгэс курдук, “Арассыыйа эрэлэ” диэн биһирэбил баар буолуоҕа. Тэрийээччилэр графика, живопись, сыыппаралаах ускуустуба, оҥоһуу өй (ИИ) көмөтүнэн оҥоһуллубут үлэлэри ылаллар.
Куонкурус бастакы сезонугар Арассыыйа 84 эрэгийиэниттэн уонна Бангладеш, Гана, Зимбабве, Кыргызстан, Ливан, Беларусь, Эквадор, Казахстан, Приднестровскай Молдавия Өрөспүүбүлүкэтэ курдук атын дойдулартан 3200 кэриҥэ үлэ киирдэ. 13 номинацияҕа —39, “Арассыыйа эрэлэ” категорияҕа 20 кыайыылаах баар.
Куонкурус туһунан сиһилии https://время-смыслов.рф билсиэххэ сөп.
СӨ Ил Дарханын уонна бырабыыталыстыбатын пресс-сулууспата