Атамайга Үчүгэй толоон сиригэр Атамай ыһыаҕа-2026 үрдүк таһымнаахтык, тэрээһиннээхтик буолан ааста.
Саха омуга үгүс үйэлэри уҥуордаан кэлбит, сүрэҕэр-быарыгар чугастык туппут, айылҕалыын алтыһан этэ-хаана чэпчиир, кута-сүрэ ыраастанар сүрүн бырааһынньыгынан — Үрүҥ Тунах ыһыах буолар. Үчүгэй толоон сирэ көҕөрөн, чэлгийэн, күммүт уота чаҕылыччы мичилийэн кэлбит дьону үөрэ-көтө уруйдуу-айхаллыы көрүстэ. Ыһыах арыллыытыгар арылы маҥан халлаан анараа сиксигиттэн Айыы кыыллара, сэттэ кыталык көтөн тэлээрэн биһиги түһүлгэбитин киэргэттилэр.
Эллэй эһэбит алгыс тылы амалыйан, уйгубутун уһаппытын, төлкөбүтүн түстээбитин үйэтитээри, ас кэбиспит сиэрин ситэрэн, туомун тутуһан, алгыс түһэр сирин түптэ буруотунан унаарытан арчылыыр түгэммит үүммүтэ дьону-сэргэни түмэ тарта. Ыһыах сиэрин-туомун Үрдүк Айыылартан көрдөһөн, уохтаах кымыһынан, арыылаах алаадьынан айах тутта, алгысчыт – Алгыстан Дураһаал. Ыалдьыттары ыраастаата — араҥаччылаата.
Маннык кэрэ сайыҥҥа, маннык кэрэ кырдалга талба талаан дьоннордоох, ырыа ыллам ыччаттара «Биһиги күүспүт — сомоҕолоһууга» диэн бастакы ыччат бэстибээлин Атамай нэһилиэгин уус-уран кэнсиэрин көрдөрдүбүт.
Култуура аралдьытар тэрээһиннэрэ:
1. “Үс көлүөнэ саха таҥаһа” саха төрүт таҥаһын көрүү күрэһэ. Уопсайа 4 көлүөнэ кытыыны ылла.
1 миэстэ- Иванова Варвара Гурьевна көлүөнэ дьоно
2 миэстэ -Яковлева Валентина көлүөнэ дьоно
3 миэстэ -Максимова Елизавета Афанасьевна көлүөнэ дьоно
4 миэстэ – Аввакумова Мотрена Афанасьевна көлүөнэ дьоно
Кыттааччылар, кыайыылаахтар сыаналаах бирииһинэн, туоһу суругунан наҕараадаланнылар.
2.Анна Васильевна аатынан “Толбонурар уһун суһуох” уһун суһуох көрүү күрэһигэр уопсайа 17 кыттааччы илин-кэлин түһүстэ.
Улахан дьоҥҥо
1 миэстэни Иванова Альбина Аркадьевна, Ефремова Александра Анатольевна ыллылар.
Оҕолорго
1 миэстэни Соловьева Дайаана ылла.
Ону тэҥэ күрэс саастаах кыттааччытыгар Филиппова Клара Дмитриевнаҕа “Долгууна” үҥкүү ансаамбылын анал бирииһин туттардылар. Күрэс кырачаан кыттааччытыгар Павлова Мияҕа “МираЮ” маҕаһыын анал бирииһэ туттарылынна. Муҥутуур кыайыылаахха Соловьева Дайаанаҕа, Анна Васильевна оҕолоро илин кэбиһэр уонна бастыҥа бэлэх ууннулар. Кыттааччылар бирииһинэн, туоһу суругунан наҕараадаланнылар.
Киэһээ Үрүҥ Тунах ыһыах күнүгэр аналлаах эҕэрдэ кэнсиэри дьоллоох Дьокуускай куораттан “Туймаада” судаарыстыбыннай ырыа ансаамбыла көрдөрдө. Ырыа аптаах дуорааныгар күндү көрөөччүлэри уйдардылар, сынньалаҥ киэһээтин бэлэх ууннулар.
Анна Дмитриева,
Атамай, Горнай.
Хаартыскаҕа Павлова Татьяна, Габышева Розалия, Александр Максимов түһэриилэрэ