Дьааҥы өрүскэ сорох учаастактарга уу таһыма түһэн эрэр да буоллар, балаһыанньа син биир тыҥааһыннаах. Бу туһунан бүгүн, атырдьах ыйын 2 күнүгэр, Саха Өрөспүүбүлүкэтин Гражданскай оборуонаҕа уонна нэһилиэнньэ олоҕун-дьаһаҕын куттала суох буолуутун хааччыйар миниистирин бастакы солбуйааччыта Айаал Вензель брифиҥҥэ иһитиннэрдэ.
Ол курдук, Верхоянскай куорат аттыгар уу таһыма кутталлаах 1020 см бэлиэттэн аллара түһэн, 993 см тэҥнэстэ. Ааспыт 12 чаас иһигэр уу 35 см түспүт. Куоракка 154 тиэргэн, 25 олорор дьиэ уонна социальнай суолталаах эбийиэктэр 7 тиэргэннэрэ ууга тураллар.
Боронук нэһилиэгэр уу таһыма ааспыт 12 чааска 35 см түһэн, 993 см буолбут (кутталлаах бэлиэ — 970 см). Нэһилиэккэ 70 тиэргэнтэн уу тахсыбыт, билигин 10 тиэргэн уонна социальнай суолталаах эбийиэктэр 6 тиэргэннэрэ ууга тураллар.
Баатаҕайга ааспыт 12 чаас иһигэр уу 5 см эбиллибитэ бэлиэтэнэр. Билиҥҥи көрдөрүү — 953 см, оттон кутталлаах бэлиэ — 950 см. Үс тиэргэни уу ылбыт.
Дулҕалаах өрүскэ Томтор нэһилиэгин аттыгар уу таһыма түһэр. Ааспыт 12 чааска уу 24 см түһэн, 479 см буолбут, бу кутталлаах 950 см бэлиэттэн быдан аллара.
Индигиир өрүскэ балаһыанньа туруктаах, уу таһыма критическэй кээмэйтэн ааспат. Уус Ньара, Хонуу уонна Буор Сыһыы аттыларыгар уу таһыма уларыйбакка турар. Көрдөрүүнэн сыыппаралар 474 см, 515 см уонна 593 см тэҥнэһэллэр (кутталлаах бэлиэ — 600 см).
Күбэйэ нэһилиэгин аттыгар уу таһыма 19 см түһэн, 1811 см буолбут (кутталлаах бэлиэ — 1914 см). Нэһилиэккэ 18 тиэргэн уонна 1 олорор дьиэ ууга батыллыбыт.
Сунтаар сэлиэнньэтигэр исписэлиистэр ууну ылбыт 28 тиэргэнтэн ууну оботторор уонна сүүрдэн таһаарар үлэни ыыталлар. Туойдаах нэһилиэгин кытта тырааныспар сырыыта тохтоон турар.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата