Алтынньы 19 күнүгэр Дьокуускайга Арассыыйаҕа Норуоттар сомоҕолоһууларын сылыгар уонна Саха Өрөспүүбүлүкэтигэр Култуура сылыгар анаммыт «Доҕордоһуу пуойаһа: Кыайыыга бииргэ!» норуоттар икки ардыларынааҕы култуурунай-үөрэтэр бырайыагы олоххо киллэриигэ түмүктэрин таһаарыыга пресс-кэмпириэнсийэ буолан ааста.
Спикердэр уонна бырайыак кыттыылаахтара айаннарын туһунан санааларын үллэһиннилэр, эрэгийиэннэр икки ардыларынааҕы ситими бөҕөргөтүү, ыччаты гражданскай-патриотическай тыыҥҥа иитиини сайыннарыы уонна норуоттар икки ардыларынааҕы өйдөһүү суолтатын бэлиэтээтилэр. Бырайыагы билинэр биир сүрүн туоһутунан Хабаровскай кыраай Бырабыыталыстыбатын Махтал суруга буолла. Бу наҕараада үлэ суолтатын, култуурунай атастаһыы сайдыытын уонна Уһук Илин эрэгийиэннэрин сомоҕолоһуутун бөҕөргөтүүгэ бырайыак киллэрбит кылаата үрдүктүк сыаналаммытын бигэргэтэр.
«Быйыл биһиги айаммыт ордук хаачыстыбалаахтык ааста, тоҕо диэтэххэ, көрсөр өттүбүт — Хабаровскай кыраай биһиги тиийэрбитигэр улаханнык бэлэмнэммиттэр. Биһиги бу кыраайга суһал сулууспаны бара сылдьар биир дойдулаахтарбытын кытта көрүстүбүт», — диэн Ил Түмэн Бэрэссэдээтэлин солбуйааччыта, «СӨ Норуоттарын Ассамблеята» уопсастыбаннай хамсааһын бэрэссэдээтэлэ, бырайыак дэлэгээссийэтин салайааччыта Александр Подголов санаатын үллэһиннэ.
Пресс-кэмириэнсийэ кэмигэр бырайыак географиятын уонна кыттыылаахтарын хабыытын кэҥэппитэ, эрэгийиэннэр икки ардыларынааҕы бииргэ үлэлээһини бөҕөргөппүтэ уонна уопсастыба өттүттэн үтүө сыанабылы ылбыта бэлиэтэннэ. Кыттыылаахтар олоххо киирбит тэрээһиннэр, ол иһигэр култуурунай, үөрэтэр уонна патриотическай көҕүлээһиннэр түмүктэрин, ону тэҥэ эрэгийиэннэр икки ардыларыгар уопут атастаһыытын дьүүллэстилэр. Тэрийээччилэр бырайыагы олоххо киллэриигэ кылааттарын киллэрбит дьоҥҥо барыларыгар махтаннылар уонна бырайыак инникитин да салгыы үлэлиэҕэ диэн бэлиэтээтилэр.
Санаттахха, 2024 сыл алтынньы 2-7 күннэригэр Уһук Илин федеральнай уокурукка «Доҕордоһуу пуойаһа: Кыайыыга бииргэ!» II норуоттар икки ардыларынааҕы култуурунай-үөрэтэр бырайыак ситиһиилээхтик ааспыта. Киэҥ далааһыннаах көҕүлээһин икки эрэгийиэни — Саха Өрөспүүбүлүкэтин уонна Хабаровскай кыраайы бииргэ түммүтэ. Дэлэгээссийэ маршрута Дьокуускай – Хабаровскай – Дьокуускай хайысханан ааспыта. Бырайыак чэрчитинэн барыта 24 тэрээһин ыытылынна, ол иһигэр 14 тэрээһин үс хонук устата дьыалабыай уонна култуурунай бырагыраама киин былаһааккатынан буолбут Хабаровскай куоракка ааста.
«Доҕордоһуу пуойаһа: Кыайыыга бииргэ!» бырайыак көҕүлээччитинэн Саха Өрөспүүбүлүкэтин Тас сыһыаннаһыыларга уонна норуоттар дьыалаларыгар министиэристибэтэ буолла. Бырайыак Саха Өрөспүүбүлүкэтин Арассыыйа Бэрэсидьиэнин Уһук Илин федеральнай уокурукка боломуочуйалаах бэрэстэбиитэлистибэтин, Хабаровскай кыраай Бырабыыталыстыбатын, Саха сиригэр уонна Хабаровскай кыраайга баар «Арассыыйа норуоттарын Ассамблеята» эрэгийиэннээҕи салааларын өйөбүллэринэн, А.Е. Кулаковскай аатынан Норуоттар доҕордоһууларын дьиэтин кытта бииргэ олоххо киирдэ.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.
Сиһилии: https://www.sakha.gov.ru/news/67073