Балаҕан ыйын 24 күнүн түүнүгэр ИДьМ сулууспатын «Дьокуускайдааҕы» управлениетын «Жатайдааҕы» полициятын отделын дьиэтигэр киирэн, киин куорат 18 саастаах олохтооҕо ааны тэбиэлээбит уонна арыйалларыгар модьуйбут, ол курдук полиция үлэһиттэрин үлэлэригэр мэһэйи оҥорбут.
Быраабы кэһэр дьайыыларын тохтоторугар хаста даҕаны модьуйууларга, ону таһынан анал тэриллэр уонна күүс туттуллуохтарын сөбүн туһунан сэрэтиллэн да баран, уол абааһы көрөн сыһыаннаспыт уонна күүһүнэн утарыласпыт — ол курдук полиция үлэһитин сокуоннай ирдэбилигэр бас бэриммэтэҕин көрдөрбүт. Дьокуускай куорат суутун мунньаҕар кини боротокуолу кытта сөбүлэспит, буруйун билиммит. Административнай эппиэтинэскэ тардыллар киһи буруйа дьыала матырыйаалларынан бигэргэтиллибит.
Суут кини дьайыыларын Арассыыйа Федерациятын КоАП 19.3 ыстатыйатын 1-кы чааһынан — полиция үлэһиттэрин сокуоннай ирдэбилигэр бас бэриммэт буолуу диэн сыаналаата.
Бу киһи кэргэнэ уонна үлэтэ суох, РФ КоАП 11-с уонна 12-с ыст. хаста да административнай эппиэтинэскэ тардыллыбыт эбит. 2025 сыл атырдьах ыйын 5 күнүнээҕи Дьокуускай куорат суутун бириигэбэринэн РФ ХК 166 ыстатыйатын 2 чааһын «а» пуунунан (массыынаны күрэтэн айаннатыы) сууттаммыт.
Суут кини буруйун билиммитин буруйу чэпчэтэр түгэнинэн учуоттаата.
«Суут мунньаҕар бэрэбиэркэлэммит дакаастабыллар уопсай түмүктэрин учуоттаан, суут эдэр киһини РФ КоАП 19.3 ыстатыйатын 1-кы чааһыгар көрүллүбүт административнай быраабы кэһиини оҥорбутугар буруйдааҕынан билиннэ, уонна 3 сууккаҕа административнай хаайыы көрүҥнээх накаастабылы анаата. Суут быраабы кэһии уратытын уонна буруйдаах киһи туругун учуоттаата, маныаха олоҕуран, ыйыллыбыт ыстатыйанан көрүллэр кээмэйгэ административнай хаайыы көрүҥнээх накаастабылы аныыр наадалааҕын быһаарда, тоҕо диэтэххэ, накаастабыл атын көрүҥнэрин туһаныы административнай эппиэтинэс соруктара олоххо киирэллэрин хааччыйбат», — диэн иһитиннэрэр Дьокуускай куорат суутун пресс-сулууспата.