Социальнай ситимнэргэ Дьокуускай куоракка андаатар (уу кутуйаҕын) этин атыылыылларын туһунан биллэриилэр таҕыстылар. Эти киилэтин 500 солкуобайга сыаналыыллар. Бу сонун дьон интэриэһин олус тарта.
Санатан эттэххэ, өссө 2021 сыллаахха «Атласовтар уһаайбалара» эрэсэтэрээн биллиилээх шеф-пуобара Николай Атласов эрэстэрээн менютугар кымырдаҕаһы киллэриэҕин туһунан иһитиннэрэн соһуппута. Кини кымырдаҕастаах билиинэни сии олорор видеотын уопсастыбаҕа тарҕаппыта. Ону тэҥэ, пуобар аска анал усулуобуйаҕа тутуллубут (ферментированнай) отоннор, оҕуруот аһа уонна андаатар этэ туттуллуохтара диэн кэпсээбитэ.
Бэлиэтээн эттэххэ, Саха сиригэр андаатар этин чэпчэки сыаналаах, сибиэһэй иҥэмтиэлээх (белоктаах) ас быһыытынан уруккуттан сөбүлээн сииллэр. Андаатар — ыраас ууга олорор, отунан-маһынан эрэ аһылыктанар кыыл. Ол иһин этэ олус сымнаҕас, диетическэй, туох да куһаҕан сыта суох буолар. Амтанынан куруолук эбэтэр кус этигэр маарынныыр дииллэр.
Дьон уу кутуйаҕын этин араастаан астыыр: ирииһи кытта буһараллар, сорохтор салаакка эбэллэр, оннооҕор Индия карритын курдук тумалаах экзотическай астарга кытта тутталлар.
Оттон өрөспүүбүлүкэ улуустарыгар, тыа сиригэр, андаатары сүрүннээн бултаан баран, хортуоппуйу уонна луугу кытта ыһаарылаан сииллэрин эбэтэр духуопкаҕа буһаралларын ордороллор. Сорохтор миин гынан иһэллэр, бу ордук тымныы кэмҥэ киһини ириэрэр, сэниэ киллэрэр үчүгэй хаачыстыбалаах ас буолар.