Муус устар ый саҕаланыаҕыттан Дьокуускай куоракка уот ситимин алдьатыы аҕыс түбэлтэтэ бэлиэтэннэ.
«Якутскэнерго» хампаанньа иһитиннэрэринэн, маннык быһылааннар тутуу үлэтэ саҕаламмытынан элбээбиттэр — буор уонна суол үлэтин ыытыыга сир аннынааҕы кабеллара алдьаналлар.
Муус устар 11 күнүгэр биллибэт дьон Хабаров уулуссатыгар 0,4 кВ күүстээх кабель ситимин алдьаппыттар. Онтон сылтаан «Б» киин сылытар пуунугар уот быстыбыт.
Муус устар 12 күнүгэр өссө хас да быһылаан тахсыбыт. Күнүһүн туора тэрилтэ көҥүлэ суох үлэни ыытарын түмүгэр кабель алдьанан, «Залог-1» ситимин уота араарыллыбыт. Өрөмүөн кэмигэр Богородицкай таҥара дьиэтэ уота суох олорбут. Оттон ол күн киэһэтин уунан хааччыйар хампаанньа тыраахтара Михаил Николаев проспегар баар 40/7 нүөмэрдээх элбэх кыбартыыралаах дьиэни уотунан хааччыйар кабелы быспыт.
Бу түбэлтэлэр барылара быраабы араҥаччылыыр уорганнарга бэриллибиттэр. Буруйдаахтар эппиэтинэскэ тардыллыахтара.
Киин электрическэй ситимнэр кылаабынай инженерэ Михаил Варейкис бэлиэтээбитинэн, маннык түбэлтэлэр хампаанньаҕа да, нэһилиэнньэҕэ да ночооттоохтор, оттон саамай сүрүнэ — дьон олоҕор уонна доруобуйатыгар кутталы суоһаталлар. Сир аннынааҕы кабель ситимнэрин чөлүгэр түһэриигэ элбэх бириэмэ барар.
«Ситимнэр үксүлэрэ сир аннынан тардыллаллар: уоту чөлүгэр түһэрэр туһугар бастаан алдьаммыт сирин чуолкайдык быһаарыахха наада, онтон буору хаһан баран кабелы бэйэтин чөлүгэр түһэрэр уустук үлэлэр ыытыллаллар. Маны таһынан өйдүөххэ наада — уот ситимин быстан уотунан охсоро олус кутталлаах», — диэн кини эттэ.
Энергетиктэр анал тиэхиньикэ суоппардарын уот хампаанньаларын кытта сөбүлэһиитэ суох хаһыы үлэлэрин ыыппаттарыгар ыҥыраллар уонна санаталлар: уот ситимэ үрдүк кутталлаах эбийиэк.