Бүгүн, от ыйын 8 күнүгэр, 18 ч. 50 мүн. Саха сирин Быыһыыр сулууспатын дьуһуурунай чааһыгар оҕо сүппүтүн туһунан иһитиннэрии киирбит.
Бүлүүлүүр суол 16-с килэмиэтигэр, «Сугун» диэн сөтүөлүүр сиртэн төннөн испит алта саастаах уол оҕо сүппүт.
Оҕо ийэтин кытта баран испит. Дьахтар хааман иһэн кэннин хайыһан көрбүтэ уола суох эбит. Чааһы быһа оҕотун бэйэтэ көрдөөбүт, онтон полицияҕа тыллаабыт.
Полиция оҕо сүппүтүн туһунан Саха сирин Быыһыыр сулууспатыгар биллэрбит. Дьуһуурунай симиэнэ Дьокуускай 203-с түөлбэтин сөтүөлүүр сиригэр эриэйдэ кэнниттэн тута ол сиргэ тиийбит.
Быыһааччылар сүппүт оҕону булбуттар. Оҕо илиитин тарбахтарын өлөрбүт. Быыһааччылар оҕоҕо бастакы көмөнү оҥорбуттар уонна суһал көмө үлэһиттэригэр туттарбыттар.
Оҕо ойуурга сүппүт буоллаҕына, чааһы да кэтэспэккэ 112 эбэтэр +7 (4112) 45-90-19 Саха сирин Быыһыыр сулууспатын дьуһуурунайыгар биллэриҥ. Оҕо ханна сүппүтүн, туругун уонна таҥаһын ойуулаан биэриҥ. Быыһааччылар кэлиэхтэригэр диэри оҕону бүтэһигин көрбүт сиргитигэр кэтэһиҥ диэн Саха сирин Быыһыыр сулууспата иһитиннэрэр.