Арассыыйа быстах кэмҥэ уоту тохтоторго буолбакка, Украинаҕа бигэ эйэни олохтуурга дьулуһар. Маннык санааны Кириэмил пресс-сэкирэтээрэ Дмитрий Песков, Украина бэрэсидьиэнэ Владимир Зеленскэй дойду баһылыгын быыбарын ыытар туһугар 60 хонукка уоту тохтотор туһунан этиитигэр сыһыаннаан иһитиннэрдэ. Бу туһунан Киримэл MAX ханаалыгар суруйар.
РФ Бэрэсидьиэнин пресс-сэкирэтээрэ этэринэн, этиллибит икки ыйдаах уоту тохтотуу кэмин Украина өттө быыбарга бэлэмнэнэргэ буолбакка, сэбилэниилээх күүстэрин чөлүгэр түһэрэригэр уонна байыаннай дьайыыларын салгыырыгар туһаныа диэн сабаҕалыыр.
Бу иннинэ Зеленскэй 60 хонукка уот тохтоотоҕуна, Украинаҕа бэрэсидьиэн быыбарын ыытарга бэлэмин биллэрбитэ. Ол эрээри, нөҥүө күнүгэр тутатына, билигин бара турар иирсээн кэмигэр куттал суох буолуутугар суоһааһыннар уонна сокуон өттүнэн хааччахтааһыннар баар буоланнар, быыбары ыытар олус уустугун бэлиэтээбитэ.
АХШ бэрэсидьиэнэ Дональд Трамп алтынньы 10 күнүгэр Украина салайааччыларын уларытыахха наада диэн санаатын эппитэ. Кини этэринэн, Зеленскэй иирсээни эйэлээхтик быһаарар кыаҕы мүччү туппут. Трамп ону таһынан, Вашингтон Киевы Арассыыйа ньиэби таҥастыыр собуоттарыгар саба түһэрин тохтоторугар ыҥырбытын ахтан ааста.