«Дьулуур» өрөспүүбүлүкэтээҕи адаптивнай күрэс көрүҥнэринэн XV үбүлүөйдээх спартакиадата бэс ыйын 16-19 күннэригэр Дьокуускай куоракка буолар.
Спартакиада түмүктүүр чааһыгар 600-тэн тахса спортсмен, ол иһигэр байыаннай дьайыы кыттыылаахтара, 50 киһи кыттыыны ылыахтара.
Тэрээһин РФ Бэрэсидьиэнэ В.Путин көҕүлээбит «Спорт России» судаарыстыбаннай бырагыраама сыалын-соругун толорор.
Күрэхтэһиини бэлэмнииргэ уонна ыытыыга үлэ туһунан СӨ Бырабыыталыстыбатын Бэрэссэдээтэлин солбуйааччы Сергей Местников салалталаах тэрийэр кэмитиэт мунньаҕар көрдүлэр.
—Быйылгы сыл биир сүрүн спортивнай түгэнинэн, Ил Дархан Айсен Николаев дьаһалынан ыытыллар успуорт адаптивнай көрүҥнэригэр өрөспүүбүлүкэтээҕи спартакиада буолар. Бэлэмнэнии уратыта — сөптөөх эйгэни, куттал суох буолуутун, эрчиллиини ыытыыга уонна доруобуйаларынан хааччахтаах күрэсчиттэри арыаллыырга анал усулуобуйаны тэрийии буолар. Спартакиаданы үрдүк таһымнаахтык ыытыахпыт диэн эрэнэбин, — диэн этэр кини.
Билиҥҥи туругунан голболга уонна олорон эрэ волейболлуурга сүүмэрдиир күрэхтэһиилэр ыытыллыбыттар.
Дьокуускайга күрэхтэһиилэр ыытыллалларыгар уопсайа тоҕус успуорт эбийиэгэ бигэргэтиллибит. Бу эбийиэктэргэ «Азия оҕолоро» оонньууларга бэлэмнэнии кэмигэр хапытаалынай өрөмүөннэр ыытыллыбыттара.
Санатан эттэххэ, Дьокуускайга 2004 сыллаахха буолбут успуорт адаптивнай көрүҥнэригэр I Спартакиадаҕа 120 киһи кыттыыны ылбыта.
Сиһилии: https://www.sakha.gov.ru/news/43634
СӨ Ил Дарханын уонна Бырабыыталыстыбатын пресс-сулууспата
Саргын Скрябин хаартыскаҕа түһэриитэ, ЯСИА