Дьокуускайга туризм эйгэтин уонна креативнай индустрия 100-тэн тахса бэрэстэбиитэлин муспут «Якутия — место встречи» өрөспүүбүлүкэтээҕи бэстибээл түмүктэннэ.
Муниципальнай тэриллиилэр икки ардыларыгар ыытыллыбыт куонкурус түмүгүн таһаарыы сүрүн тэрээһиннэртэн биирдэстэрэ буолла. Бастыҥ туристическай оройуонунан Хаҥалас улууһа ааттанна. Куонкурус хамыыһыйата экспозициялары, туристическай бородуукталар презентацияларын уонна эйгэни сайыннарыыга уопсай кылааты сыаналаата. Хаҥалас улууһун кыайыыта тиһиктээх үлэ сөптөөх түмүгэ буолбута бэлиэтэнэр.
Оройуоннааҕы экэниэмикэҕэ сайдыытын управлениетын салайааччыта Наталья Алексеева кинилэр экспозицияларыгар дьону олордор сирдэр тустарынан 15 информационнай матырыйаал, ону таһынан олохтоох маршруттарыгар тоҕус ураты айылҕа кэрэ сирдэрэ киирбиттэрин бэлиэтээтэ.
«Сынньалаҥ араас көрүҥнэригэр ураты болҕомто уурулунна: биһиги дойдубут устуоруйатын уонна айылҕатын дириҥник үөрэтэргэ көмөлөһөр үөрэтэр-биллэрэр маршруту, ону таһынан туризмы уонна ураты хаартыскалары сөбүлээччилэргэ фотосафари маршрутун билиһиннэрдибит», — диэн кэпсээтэ Алексеева. Кини улууска туризм тиһиктээхтик уонна стратегическайдык сайдарын бэлиэтээн эттэ. 2026 сыл бастакы кыбаарталыгар улуус баһылыгын иһинэн туризмҥа координационнай сэбиэт тэриллибитэ, ону Дмитрий Громов салайбыта. Бу күннэргэ «Хаҥалас улууһугар 2026–2030 сылларга туризмы өйөөһүн уонна сайыннарыы» муниципальнай бырагыраама чэрчитинэн куонкуруска сүүмэрдээһин саҕаланар. Ону кытта тэҥҥэ эйгэ бэрэстэбиитэллэригэр үөрэтэр сэминээрдэр уонна үлэ сиэссийэлэрэ ыытыллаллар.
Атын кыайыылаахтар: «Бастыҥ туристическай сувенир» — Мииринэй улууһа; «Бастыҥ гастрономическай бренд» — Чурапчы улууһа; «Туризмҥа инновация» — «ЯТЭК» ПАО; «Бастыҥ креативнай бырайыак» — «ЛОРП» ПАО; «Саха сирин туризмын сайдыытыгар кылаат» — Таатта улууһа.
Бэстибээли Саха сирин Урбааҥҥа, эргиэҥҥэ уонна туризмҥа министиэристибэтин уонна Гарантийнай пуонда өйөбүлүнэн Туризмы сайыннарыы уонна территориальнай маркетинг ааҕыныстыбата тэрийдэ. Икки күн иһигэр манна 5 тыһыынча кэриҥэ киһи сырытта. Тэрээһин былаһааккатыгар муниципальнай оройуоннар, туроператордар уонна партнердар 50-ча истиэндэлэрэ үлэлээтилэр, оттон дьыалабыай бырагыраамаҕа 50-тан тахса спикер тыл эттэ.
Бэстибээл сүрүн сыала — туриндустрия, креативнай индустрия бэрэстэбиитэллэрин уонна өрөспүүбүлүкэ олохтоохторун икки ардыларыгар сибээһи олохтооһун, саҥа туристическай маршруттары билиһиннэрии уонна уопутунан атастаһыы. Тэрээһин РФ бэрэсидьиэнэ Владимир Путин көҕүлээбит «Туризм уонна ыалдьытымсах буолуу индустрията» нацбырайыагын уонна Саха сиригэр туризмы сайыннарыы 2030 сылга диэри стратегиятын чэрчитинэн ыытыллар.