Харчыны көһөрүү саҥа быраабылалара биирдиилээн дьон (физические лица) бэйэ-бэйэлэригэр ыытыһар харчыларын таарыйбат диэн РФ Үпкэ министиэристибэтигэр иһитиннэрдилэр.
Докумуон бүддьүөт систиэмэтигэр уонна казначействоҕа сыһыаннаах төлөбүрдэри таарыйар. Саҥа уларыйыы муус устар 1 күнүттэн киирэр
Ол курдук бүддьүөт систиэмэтигэр (түһээн, хомуур, ыстараап), ону таһынан казначейскай счекка ыытар төлөбүрдэргэр реквизиттэри барытын толору аатынан суруйан ыытыахтааххын.
Биирдиилээн урбаанньыттар толору ааттарын-суолларын, правовой статустарын ыйаллара ирдэнэр, оттон юридическэй сирэйдэр төлүүллэригэр тэрилтэлэрин толору официальнай аатын барытын суруйуохтаахтар.
Төлөпүөнүнэн СБП нөҥүө харчыны көһөрүүгэ уларыйыы тахсыбата. Арай бөдөҥ сууманы көһөрөөрү гыннаххына, баан урукку үөрүйэҕинэн чуолкайдыыр ыйытыыларын биэриэн сөп. Онон бөдөҥ сууманы ыытар буоллаххына, эрдэттэн бааны сэрэтэриҥ ордук диэн эспиэрдэр сүбэлииллэр.