РФ Бэрэсидьиэнэ Владимир Путин бу сыл балаҕан ыйын 1 күнүттэн икки уонна онтон элбэх оҕолоох ыалларга балтараа сылга диэри (18 ый) ипотека сынньалаҥын туһанар кыаҕы биэрэр сокуоҥҥа илии баттаата. Бу туһунан докумуон быраап аакталарын официальнай саайтыгар таҕыста.
Саҥа сокуон оҕолоох дьиэ кэргэттэри өйүүр сыаллаах РФ Бэрэсидьиэнэ биэрбит сорудаҕын толоруу чэрчитинэн ылылынна.
Билиҥҥи туругунан, ыалга оҕо төрөөтөҕүнэ, ипотека төлөөччү дохуота 20%-тан тахса түспүт эбэтэр кирэдьиит төлөбүрэ ыйдааҕы дохуотуттан 40% куоһарбыт буоллаҕына эрэ, 6 ыйдаах сынньалаҥы ылар бырааптаах.
Саҥа сокуон дойдуга оҥо төрөөһүнүн үрдэтэр сыалтан иккис эбэтэр онтон кэлин оҕолорун төрөппүт (иитэ ылбыт) ыалларга 18 ыйга диэри болдьоххо ипотека каникулун ыларга кыах биэрэр. Маныаха дохуот намтааһынын ирдиир көрүллүбэт буолар.
Сынньалаҥ болдьоҕо иккис (уонна онтон кэлин) оҕо балтараа сааһын туолар күнүнэн түмүктэниэхтээх, оттон иитэ ылбыт буоллахтарына – иитэ ылбыт күнтэн 18 ый ааспытын кэннэ. Маныаха сүрүн иэс бырыһыана сынньалаҥ сэттис ыйыттан эрэ ааҕыллан саҕаланар.
Маннык уһун болдьохтоох сынньалаҥ биир төрөппүт оҕотунан дьиэтигэр олорон үлэлиир кыаҕа суох кэмигэр дьиэ кэргэн бүддьүөтүгэр ноҕуруусканы намтатар диэн Судаарыстыбаннй Дуума үпкэ-харчыга кэмитиэтин бэрэссэдээтэлэ Анатолий Аксаков бэлиэтээтэ.
Сокуон бу дьыл балаҕан ыйын 1 күнүттэн олоххо киириэҕэ уонна бу күн иннинэ баттаммыт кирэдьиит дуогабардарыгар эмиэ сыһыаннаах буолуоҕа.