Кэбээйигэ ыытыллыбыт Олоҥхо ыһыаҕын онно сылдьыбыт эрэ дьон буолбакка, өрөспүүбүлүкэ бүттүүнэ астына көрдө-иһиттэ.
Онуоха улахан үлэни «Саха» НКИХ суруналыыстара уонна оператордара оҥорбут өҥөлөөхтөр. Мин кэллиэгэлэрбин — тэлэбиидэнньэ уонна араадьыйа үлэһиттэрин кытта олох бииргэ алтыһа сылдьыбыт буолан, кинилэр үлэлииллэрин көрө-көрө сөҕө-махтайа сырыттым.
Халыҥ хамаанданы тэлэбиидэнньэ дириэктэрэ Олег Колесов-Талбан салайан илдьэ сырытта. Олох чаһыы курдук үлэлиир дьон. Бииртэн биир суруналыыс операторын кытта уста охсон кэлээт, көмпүүтэргэ олорон суруйаат, режиссерыгар туттарар, онтон эмиэ атын сорудаҕар сүүрэр. Салайааччылара Талбан ким тугу үлэлиирин көрө-истэ сылдьар. Эрдэттэн бары тэрээһиннэри үллэстэн кэбиспит буолан, ким ханна барарын чопчу билэр, ким да кими да мэһэйдэспэт. Олег Егорович дьонун аһын-үөлүн хааччыйа сылдьар, бары куйааска үлэлиир буолан, сүүрэн кэллэхтэринэ бытыылкалаах уулара бэлэм буолар.
Бириэмэ ыгым буолан, үлэлиир будкаларыттан арахсыбакка онно миэстэтигэр олорон эбиэттээн ылаллар. Онтон эмиэ репортажка сүүрэллэр. Суруналыыстар уонна оператордар хайдахтаах курдук биир тыынынан бэйэ-бэйэлэрин өйдөһөн, өйөһөн үлэлииллэрий! Ол да иһин түргэн-тарҕан буолан, суолталаах тэрээһини бары өттүттэн толору сырдаттылар.
Сибээс суоҕа эрэйдии сылдьыбыта эрээри, тэлэбиидэнньэ дириэктэрэ кимниин эрэ кэпсэтэ охсон, сибээһи холбуу охсоллор. Бу тухары ким да ыксаабат, ыгылыйбат, сибээс суох диэн баран олорбот. Быһата, бары бэйэлэрин дьыалаларын оҥоро сүүрэллэр. Кэлэллэригэр салайааччылара суоҕу баар гынарыгар эрэнэллэрэ оччо.
Мин эбиэккэ кинилэри кытта аһыыр дьолго тиксэн, ол быыһыгар кинилэри видеоҕа устан ылбытым. Бары да сып-сап аһыы охсоот, үлэбитигэр сүүрбүппүт. Бараары туран, суруналыыстар үлэлии олрор буудкаларын өҥөйөн көрбүтүм.
Суруналыыстар Софья Наумова, Сардаана Худогизова, Александра Охлопкова эбиэттиир да бокуойдара суох олороллоро.
Дьэ, ити курдук сүүрэн-көтөн, «Саха» НКИХ суруналыыстара уонна оператордара буолуохтаах буолуохтааҕын курдук оҥорор күннээҕи үлэлэрин түмүгэ — Саха сирэ бүттүүн Олоҥхо ыһыаҕын көрбүтэ-истибитэ буолар. Махтал эһиэхэ, «Саха» НКИХ үлэһиттэригэр!