Өбүгэлэрбит хайдах күн-дьыл буолуон эндэппэккэ билэллэрэ. Айылҕа араас көстүүтүн, оту-маһы, кыылы-сүөлү кэтээн көрөллөрүн туһунан элбэхтэ суруллар. Холобур, саҥа ый туруору тахсыбыт буоллаҕына, туох дииллэрий? Эбэтэр хаар көмүрүөтэ элбэх буоллаҕына?
- Саҥа үүнэр ый туруору таҕыстаҕына — хаара суох, тымныы ый үүммүтүн бэлиэтэ.
- Саҥа ый иттэннэри эбэтэр сытыары таҕыстаҕына — былыттаах, хаардаах ичигэй ый үүнэрин билгэтэ.
- Сулустар бачыгырыы хойуутук чаҕылыҥнастахтарына — халлаан тымныйар.
- Кыһынын салгын соҕурууттан, арҕааттан ыллаҕына — тымныйар. Хотуттан, илинтэн салгыннаннаҕына — тыал, хаар түһэр.
- Хаар көмүрүөтэ элбэх буоллаҕына уулаах, ардахтаах сайыны кэтэһэҕин.
А.А.Яковлев «Баай Барыылаах Байанайдан!» кинигэтиттэн
«Бичик», 2014 с.