Дойдуга балаҕан ыйын 1 күнүттэн сыыппара солкуобайын олоххо киллэриини саҕалыахтара. Дьон-сэргэ чэпчэкитик ылыналларыгар, бу үлэ түһүмэҕинэн ыытыллыаҕа. Бу туһунан Федерация Сэбиэтин сыыппара экэниэмикэтин сайыннарыыга сэбиэтин бэрэссээдэтэлин солбуйааччы, сенатор Артем Шейкин ТАСС ааҕыныстыбаҕа иһитиннэрдэ.
Былаан быһыытынан, балаҕан ыйын 1 күнүттэн сыыппара солкуобайынан 21 баан үлэлиэҕэ. Онтон кэлин — 2028 сыл балаҕан ыйыгар диэри — дойду бары бааннара бу тиһиккэ кыттыһыахтаахтар. «Балаҕан ыйын 1 күнүттэн сокуон күүһүгэр киирэр уонна сорох бааннарга сыыппара солкуобайы түһүмэҕинэн киллэрии саҕаланыаҕа. Сыыппара солкуобайын хас биирдии киһи бааннарын мобильнай сыһыарыыларынан туһаныахтарын сөп», — диэтэ сенатор. Парламентарий бэлиэтээбитинэн, саҥа төлөбүр көрүҥэр көһүү олус сымнаҕастык ааһыаҕа.
Сыыппара солкуобайа диэн тугуй?
Бу — дойдубут национальнай валютатын үһүс көрүҥэ буолар. Тэхинничэскэй өттүнэн ыллахха, хас биирдии маннык солкуобай — туспа ураты сыыппара кода буолар. Дьон электроннай көһүлүөктэригэр сурук быһыытынан хараллар. Бу көһүлүөктэр дойду Киин баанабэйэтэ анал оҥорбут цифровой платформатыгар баар буолуохтара.
Хайдах туһанабыт?
Сыыппара солкуобайынан туһанар туһугар бэйэҥ бааныҥ мобильнай сыһыарыытыгар киирэн, сыыппара солкуобайын платформатыгар бэлиэтэниэххэ уонна электроннай көһүлүөгү аһыныахха наада. Балаҕан ыйын 1 күнүттэн сүрүн, улахан бааннар сыһыарыыларыгар маннык анал хайысха баар буолуоҕа.
- Туохха туһаныахха сөбүй? Сыыппара солкуобайын хамнас, биэнсийэ дуу, атын да төлөбүрдэри ыларга талыахха сөп. Ону таһынан маҕаһыыннарга төлүүргэ уонна атын дьоҥҥо харчы ыытарга туһаныллар.
- Комиссия баар дуо? Көннөрү харчыга уларытарга комиссия уһуллубат.
Сүрүн хааччахтар уонна уратылар
- Биир эрэ көһүлүөк: Хас биирдии киһи бэйэтигэр биир эрэ электроннай көһүлүөгү арынар кыахтаах.
- Банкоматтан уһуллубат: Сыыппара солкуобайын банкоматтан устан ылар кыаллыбат. Ол туһуттан аан маҥнай көннөрү каартаҕар сыыппара солкуобайын уларытыахтааххын, ол кэннэ эрэ устан ылаҕын.
- Бырыһыан уонна кэшбэк суох: Сыыппара солкуобайыгар баан бырыһыана ааҕыллыбат уонна төлөбүр оҥорбут иһин кэшбэк төлөммөт.