Кулун тутар ыйыттан Саха сирин олохтоохторо «MAX» национальнай мессенджергэ мэдиссиинэ тэрилтэлэрин кытта быһа сибээһинэн туһанар кыахтаннылар.
Саха сирин олохтоохторугар анаан «Саха-Якутия. Здоровье» диэн анал мэдиссиинэ чаата (мэдчаат) тэрилиннэ. Онно кинилэр мэдиссиинэ көмөтүн ылалларыгар көрсөр кыһалҕаларын туһунан суруйуохтарын, ону тэҥэ 2 чаас иһигэр мэдиссиинэ тэрилтэлэрин бэрэстэбиитэллэриттэн суһал быһаарыылары уонна чуолкай эппиэттэри ылыахтарын сөп. Бу туһунан www.sakha.gov.ru саайт иһитиннэрэр.
«“ЗдравКонтроль” федеральнай бырайыак дойду үрдүнэн салгыы сайдар, ыарыһахтарга саҥа сыыппара көмөлөһөөччүлэрин — мэдиссиинэ чааттарын билигин MAX мессенджергэ эмиэ киллэрэр. Биһиэхэ биир кэлим коммуникационнай эйгэни тэрийии олус улахан суолталаах», — диэн бырайыак ааптара уонна салайааччыта, РФ Уопсастыбаннай балаата чилиэнэ Евгений Мартынов бэлиэтиир.
Мэдчаат туһунан иһитиннэрии балыыһалар саайтарыгар уонна социальнай ситимнэригэр, өрөспүүбүлүкэ уонна куорат СМИ-лэригэр, поликлиникаларга, регистратураларга, ол эрэ буолбакка төрөппүттэр чааттарыгар тиийэ тахсар — нэһилиэнньэни киэҥник сырдатыы үлэтэ барар.
Олохтоохтор мэдчаат көмөтүнэн быһаарар сүрүн боппуруостара — мэдиссиинэ көмөтүн күүтүү болдьоҕо кэһиллиитэ, бырааска сурутууга, бырааһы дьиэҕэ ыҥырыыга, чэпчэтиилээх эмтэри ылыыга кыһалҕалар, төлөбүрдээх өҥөлөрү соҥнооһун, этиканы уонна деонтологияны кэһии, ыарыһахтары салайыы (маршрутизация) суоҕа уо.д.а. буолаллар.