Саха сиригэр «Мобильнай хирургическай киин» инновационнай бырайыагы олоххо киллэрии салҕанар. Бырайыак Ил Дархан Айсен Николаев сорудаҕынан 2024 с. саҕаламмыта.
—Икки сыл иһигэр мобильнай хирурдар 1612 эпэрээссийэни оҥорбуттар. Бу идэлэрин баһылаабыт миэдиктэр хамаандаларын кичэллээхтик бэлэмнэниилэрин түмүгэ. Быйыл 15 улууска 22 барар-кэлэр, сылдьар былааннаахтар. Ол иһигэр, Эдьигээҥҥэ, Анаабырга, Аллайыахаҕа, Дьааҥыга, Булуҥҥа, Орто Халымаҕа тиийэ сылдьыахтара. Араас эпэрээссийэлэри оҥоруохтара, — диэн Өрөспүүбүлүкэтээҕи 2 №-дээх балыыһаттан — мэдиссиинэ суһал көмөтүн оҥорор киинтэн иһитиннэрэллэр.
Бу балыыһа мобильнай хирурдара ааспыт 2025 сылга 16 улууска уопсайа 26 сылдьыбыттара. Ол түмүгэр, 2 615 киһини көрбүттэрэ. Итинтэн 935 киһини эпэрээссийэлээбиттэрэ. Былырыын мобильнай хирурдар сылдьар географиялара кэҥээбитэ. Ол курдук Аллайыахаҕа, Аллараа Халымаҕа, Булуҥҥа, Дьааҥыга сылдьыбыттара.
—Мин өттүгүм уҥуоҕа ыалдьыбыта ыраатта. Араас эми-тому, укуоллары аныыллар этэ да, ааһан биэрбэтэҕэ. Хаамарбар, ороммуттан турарбар ыарахан буолара, сүһүөҕүм иһэн хаалара. Хас да сыл оннук эрэйдэммитим. Поликлиникаҕа эндопротезированиеҕа уочаратыҥ ыраах дииллэр этэ. Онтон бу ааспыт сылга оройуон балыыһатыттан эрийэн ыҥырбыттара. Дьокуускайтан травматолог-ортопед кэлэр диэбиттэрэ. Онон болдьообут күннэригэр кэлэммин анаалыстарбын туттарбытым, ФГДС көрдөрбүтүм, уо.д.а. ирдэнэргэ барытыгар сылдьыбытым. Аҕыйах хонон баран куораттан быраастар кэлбиттэрэ уонна эпэрээссийэлээбиттэрэ. Бастаан хаамарбар кыратык ыалдьар этэ, кэлин үчүгэй буолбута. Билигин тайахтаммаппын. Онон мэдиссиинэ бары үлэһиттэригэр махталым муҥура суох. Эпэрээссийэлээбит быраастарбар махтал. Аатын өйдөөбөппүн. Кини көмүс илиилэрэ миигин атахпар туруордулар, — диэн Нерюнгриттан Мария Н.махтанар.
Сиһилии: https://www.sakha.gov.ru/news/20816
СӨ Ил Дарханын уонна Бырабыыталыстыбатын пресс-сулууспата