Өксөкүлээх Өлөксөй аатынан Норуоттар доҕордоһууларын дьиэтигэр Норуот маастарын күнүн чэрчитинэн норуот уус-уран оҥоһугун сайыннарыыга уонна үйэтитиигэ туһуламмыт норуот маастардарын 8-с пуорума буолан ааста.
Тэрээһиҥҥэ норуот маастардара бэйэлэрин үлэлэрин билиһиннэрдилэр, санааларын этиннилэр, уопуттарын атастастылар.
— Киһи кэрэхсиир үгүс үлэлэри билистибит. Ол курдук, П.Н. уонна Н.Е. Самсоновтар ааттарынан Хатас орто оскуолатын үлэҕэ (технологияҕа) учуутала Петр Артемьев үөрэтэр кылаастарын икки ардыларыгар настаабынньыктааһын ньыматын киллэрбит. Ол эбэтэр улахан кылаас оҕолоро алын кылаастары уһуйаллар эбит. Эдэр учуутал методическай үлэтин билиһиннэрбитэ болҕомтону тарта. Норуоттар сомоҕолоһууларын сылынан 2010 сылтан «Параскева» диэн илиинэн кыбытык тигии кулуубун үлэлэтэр Ленскэй оройуонун историяны уонна кыраайы үөрэтэр түмэл салайааччыта Елена Платонова бэйэтин үлэтин хайысхатын билиһиннэрдэ. Ленскэйдэр Санкт-Петербург, Нижнэй Новгород маннык хайысхалаах үлэлээх кулууптарын кытта ыкса ибээһи тутуһаллар эбит. Таатта улууһун норуот айар дьиэтин сүрүн методиһа Иван Иванов норуот маастардара айылҕа баайынан оҥорон таһаарбыт сувенир бородууксуйаларын батаран, култуура кодун ороскуотун толору толуйбуттарын бэлиэтээтэ. Маны таһынан, уустар айымньылаах үлэлэрин туһунан Сунтаар улууһун уран тарбахтаахтарын түмсүүтүн салайааччыта Ксения Семенова билиһиннэрдэ. Өлөөн улууһугар иис-уус сайдыытын Өлөөн эбэҥки национальнай оройуонун маастара Любовь Павлова кэпсээтэ. Пуорум кыттааччыларын этиилэрин анал боротокуолга киллэрдибит. Кинилэри кытта салгыы үлэлэһиэхпит, — диэн бэлиэтээтэ култуура уонна духуобунас миниистирэ Афанасий Ноев.
Пуорум түмүгүнэн резолюция ылылынна. Онно этиллэринэн, култуура уонна духуобунай сайдыы министиэристибэтэ уонна «Симэх» уус-уран оҥоһук национальнай киинэ норуот маастардарын пуорумнарын салгыы ыытыахтара. СӨ норуотун маастарын чиэһин кодекса оҥоһуллуоҕа. Ону тэҥэ пуорумҥа кыттыбыт норуот маастардарын үлэлэрин мунньан хомуурунньугу таһаарыы соруга турда.