Арассыыйаҕа норуоттар сомоҕолоһууларын, Саха Өрөспүүбүлүкэтигэр Култуура, Ньурба улууһугар Успуорт, Ньурба куоракка СӨ норуоттарын IX оонньууларын көрсөр сыллар чэрчилэринэн, култуура үтүөлээх үлэһитэ, олоҥхоһут, оһуохайдьыт, чабырҕахсыт Семен Степанович Егоров-Оһоокой Сэмэн төрөөбүтэ 95 сылыгар аналлаах «Кулуба түһүлгэтин олоҥхото» оройуоннааҕы күрэх бэс ыйын 21 күнүгэр “Добун” түһүлгэҕэ ыытылынна.
Күрэҕи Н.И.Харитонов-Николай Чуор аатынан “Кыталык” Култуура дьиэтин уонна Хорула нэһилиэгин Иванов Т.Р. аатынан “Кэскил” Норуот айымньытын дьиэтин исписэлиистэрэ иилээн-саҕалаан ыыттылар.
Тойон сүбэҕэ үлэлээтилэр: СӨ култууратын туйгуна, “Саха Өрөспүүбүлүкэтэ сайдыытыгар кылаатын иһин” бэлиэ хаһаайына, Н.И.Харитонов-Николай Чуор аатынан «Кыталык» култуура дьиэтин фольклорга салаатын исписэлииһэ Николаева Розалия Николаевна, СӨ олоҥхоһуттарын ассоциациятын чилиэнэ, Дархан этээччи, олоҥхоһут Догуева Александра Васильевна, СӨ култууратын туйгуна, Ньурба улууһун култууратын бочуоттаах үлэһитэ Трофимова Наталья Федотовна, “СӨ култууратын сайдыытыгар кылаатын иһин” бэлиэ хаһаайына, СӨ үтүөлээх оһуокайдьыта, Ньурба улууһун Дархан этээччитэ Сухаринова Валентина Егоровна. Дьүүллүүр сүбэ бэрэссэдээтэлэ — Ньурба улууһун бочуоттаах олохтооҕо, СӨ култууратын туйгуна, Ньурба улууһун Олоҥхо ассоциациятын бэрэссэдээтэлэ – Тартакынова Розалия Васильевна.
Күрэххэ барыта 18-тан үөһээ саастаах уон түөрт олоҥхоһут кыттан, уус-уран тыллаах хоһуйууларга холонон көрдө. Улуус нэһилиэктэригэр талааннарын саба баттыы сыппыт бииртэн биир олоҥхоһут көҥүл тиэмэҕэ оллоонноон олорон хааччаҕа суох бириэмэҕэ олоҥхолоото. “АЛРОСА” ХЭТ ыһыах күрэхтэрин түмүгүнэн чулуу көрдөрүүлээх нэһилиэккэ “Беларусь” тыраахтар туруорбут буолан, киирсии диэн кытаанаҕа манна буолла…
Үс чааһы быһа барбыт олоҥхо күрэҕин түмүгэ маннык буолла: Кондратьева Евдокия (Чаппанда) — «Өбүгэ үгэһин үйэтитээччи» анал аат, Осипов Прокопий (Дьиикимдэ) –«Сэһэнньит бастыҥа» анал аат, Ефимова Изабелла (Антоновка) «Кылыһахтаах тойуксут», Семенов Никита Борисович (Марха) «Удьуор утумнааччы», Семенова Сайыына (Түмүк нэһ.) «Олоҥхо инники кэскилэ».
3 Үрдэл – Пахомов Андриан (Дьаархан): бирииһэ Ньурба остолобуойуттан 7000 уу харчы, 2 Үрдэл — Элеонора Семенова (Күндээдэ): бирииһэ «МТС АГРО» туруорбут тарбыйаҕа уонна фен, 1 Үрдэл — Семенова Айна (Сүлэ): бирииһэ Н.И.Харитонов-Николай Чуор аатынан «Кыталык» КД туруорбут 20000 сууммалаах сэртипикээтэ. Кылаан кыайыылааҕынан Бордоҥ нэһилиэгиттэн Людмила Саввинова буолан, «Ньурба оройуона» МТ туруорбут 30000 солкуобайын уу харчынан тутта.
Балаһыанньа быһыытынан, Людмила «Кулуба түһүлгэтин олоҥхото» өрөспүүбүлүкэтээҕи түһүмэххэ улуус аатын көмүскүү барар үрдүк чиэскэ тигистэ.
Түгэнинэн туһанан, бу күрэххэ күүс-көмө буолбут спонсордарбытыгар тэрийээччилэр ааттарыттан махталбытын тириэрдэбит!
“Кыталык” култуура дьиэтэ
