Ньурбаҕа Саха сирин норуоттарын XXIII Спортивнай оонньуулара буолара биир сыл хаалла. Бу улахан күрэхтэһии 2027 сыл от ыйын 7-11 күннэригэр ыытыллыахтаах. Түһүлгэҕэ алта тыһыынчаттан тахса күрэсчит күөн көрсүөҕэ.
Оонньуулар бырагыраамаларыгар 15 араас көрүҥ киипрбит: волейбол, баскетбол, буокса, остуол тенниһэ, чэпчэки атлетика, ох саанан ытыы, буулдьанан ытыы, шахмат, дуобат уо.д.а. Күрэхтэһиилэр Ньурбаҕа, Антоновкаҕа, Сүлэҕэ, Чаппандаҕа, Күндээдэҕэ, Ньурбачааҥҥа, барыта 12 успуорт эбийиэгэр ыытыллаллар. Күрэсчиттэри уонна официальнай дэлэгээссийэни 22 үөрэх тэрилтэтигэр түһэрэри былаанныыллар.
Оонньууларга бэлэмнэнии үлэтэ хас да хайысханан ыытыллар. Ол иһигэр спортивнай инфраструктураны тутуу уонна саҥардыы үлэлэрэ киирэллэр. Ньурба куоракка чэпчэки атлетикаҕа күрэхтэһэргэ, дьарыктанарга сылаас манежтаах, 3000 көрөөччү олорор миэстэлээх стадион тутуута салҕанар. Итини сэргэ, сөтүөлүүр бассейннаах физкултууралыыр-чэбдигирдэр комплекс тутуллар.
Маны тэҥэ Ньурба улууһун нэһилиэнньэлээх пууннарыгар спортивнай инфраструктура сайдар. Ыам ыйын 31 күнүттэн Чаппандаҕа модульнай спортивнай сааланы тутууга тутар-монтажтыыр үлэ сөргүтүллүбүт. Маннык эбийиэк Сүлэҕэ «Моя Якутия XXI век» өрөспүүбүлүкэтээҕи үтүө дьыала хамсааһынын чэрчитинэн тутуллуоҕа. Антоновкаҕа 20 миэстэлээх интэринээттээх сааланы тутарга бэлэмнэнэллэр. Бу туһунан СӨ Ил Дарханын уонна Бырабыыталыстыбатын пресс-сулууспата сырдатар.
Сиһилии: https://www.sakha.gov.ru/news/55492