Кулун тутар 16 күнүгэр 18:47 чааска ИДьМ Дьокуускйадааҕы 2-с №-дээх полиция отделыгар Дьокуускай куорат Каландаришвили уулуссатыгар баар олорор дьиэ подъеһыгар 8 саастаах уол атын оҕоҕо саба түспүтүн туһунан иһитиннэрии киирбит.
Төрөппүттэр эппиттэринэн, быһылаан 13:00 чаас саҕана оҕо бөҕү быраҕа таһырдьа тахсыбытыгар буолбут. Ийэтэ баарыгар эмсэҕэлээбит оҕо уулуссаттан дьиэтигэр киирэн иһэн, подъезка бэйэтин саастыылааҕа уол оҕону көрбүт. Ол уол уга суох дьэбиннирбит быһахха маарынныыр биридимиэтинэн кэтэҕэр охсубут. Киэһэ уол төрөппүттэрэ кэлбиттэригэр туох буолбутун кэпсээбит.
Эмсэҕэлээбит уолу СМЭ Бюротугар экспертизаҕа ыыппыттар. Ону сэргэ ПДН иниспиэктэрдэрэ Сайсары уокуругар орто уопсай үөрэхтээһин оскуолатыгар үөрэнэр иккис кылаас оҕото буоларын быһаарбыттар.
Бэҕэһээ бу быһылаанынан, уолаттар төрөппүттэригэр полиция сэрэтии биэрбитин туһунан ИДьМ пресс-сулууспата иһитиннэрэр.
ИДьМ Дьокуускайдааҕы полиция отделын ПДН иниспиэктэрдэрэ бу быһылаанынан бэрэбиэркэни ыыппыттар. Иниспиэктэр өрүттэри икки өттүттэн ыйыталаспыт. Төрөппүттэрэ баалларыгар уолаттар бэйэ-бэйэлэрин кытта билсэллэрин бигэргэппиттэр. Быһылаан тахсар күнүгэр таһырдьа бииргэ оонньообуттар, ол сылдьан кинилэр икки ардыларыгар иирсээн тахсыбыт.
Полиция үлэһитин кытары кэпсэтиигэ, оскуола оҕолоро иккиэн быһахтаах сылдьыбыттарын билиммиттэр. Онно өссө биирдэстэрин балта баар эбит.
Полиция үлэһиттэрэ биир куукуна быһаҕын подъезд кирилиэһин анныттан, иккиһин уот щитыгар кистэммитин булбуттар. Төрөппүттэр икки өттүттэн кинилэр куукунаҕа туттар быһахтара буолалларын билбиттэр.
Эрдэ иһитиннэриллибитин курдук, оҕолор үөрэнэр оскуолаларын дириэктэри иитэр үлэҕэ солбуйааччыларыгар биллэрбиттэр. Ону тэҥэ быһылаан туһунан атын сэрэтэр үлэни ыытар тэрилтэлэргэ иһитиннэрии барыа. Бу оҕолору кытта сэрэтэр үлэ ыытыллыбыт. Төрөппүттэргэ официальнай сэрэтии бэриллибит.