Сайын оҕурсу өлгөмнүк үүнэрин быһыытынан, киһи бэрт түргэнник хал буолар. Оҕурсуттан бу курдук араас судургу салааттары астаан дьиэлээхтэргитин күндүлээҥ. Бу салааттартан киһи хаһан даҕаны хал буолбат.
Бөдөҥнүү бысталаммыт оҕурсу
Туох ирдэнэр:
Оҕурсу – 3 улахан
Эриэппэ луук – 1 устуука
Чеснок – 4-5 өлүү
Мас арыыта – 2 ост. ньуоска
Соевай соус – 3 ост. ньуоска
Туус – ким төһөнү сөбүлүүрүнэн
Кыһыл, хара мээккэ биэрэстэр – ким төһөнү сөбүлүүрүнэн.
Хайдах оҥоробут:
Оҕурсуну сууйан, куурда сотон баран уһун синньигэс гына бөдөҥнүү бысталыыбыт (устатынан). Иһиккэ кутан баран кырбастаммыт луугу, чесногу, тууһу-туманы кутан булкуйабыт.
Халбаһылаах, оҕурсулаах салаат
Туох ирдэнэр:
Ыыһаммыт халбаһы – 150 кыраам
Оҕурсу – 300 кыраам
Сымыыт – 3 устуука
Кэнсиэрбэлэммит күөх горох – 100 кыраам
Эриэппэ луук – орто кээмэйдээх луук аҥаара
Укуруоп – 20 кыраам
Майонез – 70 кыраам
Туус – ким төһөнү сөбүлүүрүнэн
Хара мээккэ биэрэс – ким төһөнү сөбүлүүрүнэн.
Хайдах оҥоробут:
Түөрт муннуктуу кырбастаммыт халбаһыны, сымыыты, оҕурсуну, бытархай гына кырбаммыт укуруобу, луугу, уута сүөкэммит горуоҕу иһиккэ кутабыт уонна майонез, туус-тума кутан баран булкуйабыт. Чаас аҥаара туруора түһэн баран сиибит. Халбаһы оннугар биир күн куурусса этин, иккис күн балык кэнсиэрбэтин эмиэ кутуохха сөп.
Оҕурсулаах, моркуоптаах салаат
Туох ирдэнэр:
Оҕурсу – 4 устуука
Моркуоп – 1 устуука
Кыһыл эриэппэ луук – 1 устуука
Чеснок – 1 өлүү
Укуруоп – 100 кыраам
Соевай соус – 1 ост. ньуоска
Мас арыыта – 2 ост. ньуоска
Сахар – ким төһөнү сөбүлүүрүнэн
Туус – ким төһөнү сөбүлүүрүнэн.
Хайдах бэлэмниибит:
Оҕурсуну сууйан баран ортотунан аҥаардыыбыт, бу аҥаардаммыттары устатынан өссө биирдэ ортотунан бысталыыбыт. Оччотугар уһун синньигэс буолуохтаах. Бэлэмнэммит оҕурсуну ас кутар салаппаан бакыакка угабыт, манна уһун синньигэс гына теркаламмыт моркуобу, эмиэ итинник кырбастаммыт луугу кутабыт. Чесногу бытархай гына теркалыыбыт, укуруобу кыра гына кырбыыбыт уонна оҕуруот аһыгар кутабыт. Үрдүгэр соевай соуһу, мас арыытын, тууһу, саахары эбэн баран сэрэнэн сахсыйабыт. Салааты чаас аҥаара курдук холодильникка туруора түһэн баран сиибит.
Сүөгэйдээх оҕурсу
Туох ирдэнэр:
Оҕурсу – 3 устуука
Сымыыт – 3 устуука
Хонуу лууга – 150 кыраам
Сүөгэй (сэппэрээтэргэ сүүрдүллүбүт өссө үчүгэй) – 100 кыраам
Туус – ким төһөнү сөбүлүүрүнэн.
Хайдах бэлэмниибит:
Сууллубут, куурбут күөх луугу бытархай гына кырбастыыбыт, туус эбэбит уонна кичэйэн ныһыйабыт.
Оҕурсуну орто кээмэйдээх гына кырбаныллар уонна үрдүгэр түөрт муннуктуу бысталаммыт сымыыты, луугу, сүөгэйи, тууһу кутан сэрэнэн булкуйуллар. Манна ытырыык от (крапива) сэбирдэҕин итии уунан саба ыһан, бытархай гына кырбаан баран куттахха өссө ураты амтаны биэрэр.