Саха сиригэр аҕам саастаах дьон физкултууранан уонна успуордунан дьарыктаныылара сылтан сыл кэҥээн иһэр. Ааспыт сыл түмүгүнэн маннык дьон ахсаана 38 510 киһиэхэ тэҥнэспит буоллаҕына, быйылгы сыл саҕаланыытыгар бу көрдөрүү 39 706 киһиэхэ тиийэ улааппыт. Бу туһунан СӨ Физическэй култуураҕа уонна успуорка министиэристибэтэ иһитиннэрдэ.
Дьону хамсатар, көхтөөх олоххо угуйуу үлэтэ Арассыыйа бэрэсидьиэнэ Владимир Путин сорудаҕынан олоххо киирэр «Арассыыйа успуорда» федеральнай судаарыстыбаннай бырагыраама, «Биир ньыгыл Арассыыйа» баартыйа норуодунай бырагырааматын «Кэскиллээх чэгиэн» бырайыагын уонна Саха сирин Ил Дархана Айсен Николаев «СӨ Уопсастыба доруобуйатын бөҕөргөтүү уонна доруобуйа харыстабылын ситимин сайыннарыы стратегическай хайысхаларын туһунан» стратегическай ыйааҕын чэрчитинэн ыытыллар.
Физкултууранан дьарыктанар биир саамай аҕам саастаах биир дойдулаахпытынан 95 саастаах Егор Артамонов буолар. Ытык сааһыгар үктэммитин үрдүнэн, бэтэрээн көхтөөх олоҕу тутуһар уонна бэйэтин эрчиминэн дьону сөхтөрөр. Кини чэгиэн туруктаах буолуутун кистэлэҥэ судургу уонна хас биирдии киһиэхэ тиийимтиэ: күн аайы сарсыардааҥҥы сэрээккэ, 25 сыл тухары дьарыктанар йога уонна сүүрүү.
«Мин сөбүлүүр дьарыгым — сүүрүү. 73 сыл сүүрэбин, бүтэһигин ааспыт сылга Кыайыы 80 сылыгар анаан 4 килэмиэтири сүүрбүтүм. Күн аайы сэрээккэлиибин, ону таһынан йоганан дьарыктанабын. Миэхэ тугум да ыалдьыбат. Биир саастыылаахтарбар биэнсийэҕэ тахсан баран олорон эбэтэр сытан хаалбакка, элбэхтик хамсаналларыгар баҕарыам этэ», — диэн үллэһиннэ Егор Артамонов.
Өрөспүүбүлүкэҕэ сүрүн болҕомтону уурар хайысхалартан биирдэстэринэн — нэһилиэнньэ мэлдьи хамсанарыгар сөптөөх усулуобуйаны тэрийии буолар. Өрөспүүбүлүкэ успуорт эбийиэктэригэр сарсыарда 06:00 чаастан 08:00 чааска диэри босхо сарсыардааҥҥы сэрээккэлэр тэриллэллэр. Манна 22 тыһыынчаттан тахса аҕа саастаах киһи хабыллар.
Сиһилии: https://www.sakha.gov.ru/news/57984