Бу сыл олунньутуттан Бырабыыталыстыба Бэрэссэдээтэлин солбуйааччы Сергей Местников өйөбүлүнэн Ем. Ярославскай аатынан Саха сиринээҕи хотугу омуктар устуоруйаларын, култуураларын судаарыстыбаннай холбоһуктаах түмэлигэр бырайыак олоххо киирбитэ. Тэрээһин олоҥхону, билиини, уопуту оннунан хаалларар, көлүөнэттэн көлүөнэҕэ тириэрдэр соруктаах.
“Биһиги уопсастыбабытыгар өрүү суолталаах эрэгийиэннэр устуоруйаларын, култуураларын нэһилиэстибэтин, уратыларын харыстыыр туһугар кыаллары барытын оҥоруох тустаахпыт”, – диэн Арассыыйа Бэрэсидьиэнэ Владимир Путин бэлиэтээн турар.
“Олоҥхо балаҕана” бырайыак сүрүн сыала – кыттааччыларга саха омук көрүүтүн, сыаннаһын уонна толкуйун тириэрдэр култуура тыыннаах нэһилиэстибэтин быһыытынан саха эпоһын тириэрдии. Манна олоҥхо литэрэтиирэ көннөрү айымньытын быһыытынан эрэ буолбакка, тыл, муусука, сиэр-туом уонна эпическэй хамсаныы биир ситимнээҕин көрдөрөр диэн бырайыагы көҕүлээччилэр бэлиэтииллэр.
Түмэл үлэһиттэрэ иһитиннэрбиттэринэн, бырайыак тэрээһиннэрэ ыйга биирдэ, балаҕан иһигэр камернай көрүҥүнэн ыытыллаллар. Бу былыргылыы тыыннаах сэһэргэһиини олохтуур дииллэр. Маныаха сүрүн оруолу олоҥхоһут ылар. Бу туһунан Ил Дархан уонна Бырабыыалыстыба пресс-сулууспата суруйар. Салгыы манна ааҕыҥ.