Саха сиригэр физическэй култуура уонна успуорт эйгэтигэр исписэлиистэри тыа сирин нэһилиэнньэлээх пууннарыгар тардарга туһуламмыт «Земскэй тириэньэр» бырагыраама кыттыылаахтарын куонкуруһунан талыы салҕанар.
2026 сылга өрөспүүбүлүкэҕэ кыра нэһилиэнньэлээх пууннарга үлэҕэ киириэхтээх тириэньэрдэргэ биир кэмнээх төлөбүрү биэриигэ 18 квота көрүллэр.
Бырагыраама РФ Бэрэсидьиэнэ Владимир Путин сорудаҕынан олоххо киирэн тыа сиригэр квалификациялаах каадырдары тардыыга туһуланар. У
Исписэлиистэри тардыы үлэтэ РФ Бэрэсидьиэнэ Владимир Путин сорудаҕынан көҕүлэммит «Спорт России» федеральнай судаарыстыбаннай бырагыраама, СӨ Ил Дарханын «О стратегических направлениях укрепления общественного здоровья и развития системы здравоохранения Республики Саха (Якутия)», ону сэргэ «Биир ньыгыл Арассыыйа» баартыйа норуодунай бырагыраамата уонна «Здоровое будущее» баартыйа бырайыагын сыалларыгар-соруктарыгар сөп түбэһэр.
СӨ физическэй култууратын уонна успуордун министиэристибэтэ бырагыраамаҕа кыттарга сайаапкалары 2026 сыл атырдьах ыйын 10 күнүгэр диэри ылар. Куонкурус түмүгүнэн атырдьах ыйыгар кыайыылаахтар быһаарыллыахтара, ол кэнниттэн балаҕан ыйын 1 күнүттэн исписэлиистэр өрөспүүбүлүкэ нэһилиэнньэлээх пууннарыгар үлэлиэхтэрэ.
2025 сылга сөбүлэһиини үс исписэлиис түһэрсибитэ. Байыаннай дьайыы бэтэрээнэ, көҥүл тустууга тириэньэрдиир Петр Парников Мэҥэ Хаҥалас оройуонун Петровка сэлиэнньэтигэр, көҥүл тустууга тириэньэрдиир Петр Суздалов Хаҥалас оройуонугар, онтон саахымат тириэньэр Мария Охлопкова Жатайга үлэлииллэр.
—Дойду Бэрэсидьиэнэ Владимир Путин көҕүлээһининэн «Земскэй тириэньэр» диэн олус наадалаах бырагыраама үлэҕэ киирдэ. Аармыйа кэнниттэн мин бу эйгэҕэ үлэ көрдөөбүтүм. Тоҕо диэтэххэ, тириэньэрдээн баран, оҕолору кытта алтыһарбын, үлэлиирбин сөбүлээн, маннык үлэлиэхтээх эбиппин диэн өйдөөбүтүм. Бырагыраама туһунан билэн баран куонкуруска докумуоннарбын туттарбытым. Хас да вакансияттан Мэҥэ Хаҥалас улууһун талбытым. Бу улууска күүстээх баазалаахтар, тустууктары бэлэмниир үчүгэй үгэстэрдээхтэр, — диэн Петр Парников бэлиэтиир.
«Земскэй тириэньэр» бырагыраама 2025 сыллаахха Уһук Илиннээҕи уонна киин федеральнай уокуруктарга ыытыллыбыта. 2026 сылтан дойду үрдүнэн олоххо киирбитэ. Бырайыак тыа сиригэр уонна ыраах нэһилиэнньэлээх пууннарга физическэй култуураны уонна успуорду сайыннарарга тириэньэрдэри өйүүргэ туһуланар.
Манна көрүөххэ, чопчулаһыахха сөп: https://minsport.sakha.gov.ru/zemskiytrener
Сиһилии: https://www.sakha.gov.ru/news/58123
СӨ Ил Дарханын уонна Бырабыыталыстабытан пресс-сулууспата