Бүгүн — Тыйаатыр күнэ. Саха тыйаатыра «оргуйан» олорор.
Бу киэһэ сүгүрүҋээччилэр муһуннулар. Көрөөччүлэр бу күн тыйаатыр бары кистэлэҥ муннуктарыгар киирэр кыахтаахтар.
Бөлөхтөрүнэн араартаан экскурсиялаттылар. Артыыстар гримернайдарыгар, реквизиттэр, көстүүмнэр хараллар хосторугар, сыана аннынааҕы хоско, о.д.а. сылдьан, көрдүлэр-иһиттилэр. Артыыстары тутан ылан кэпсэттилэр, хаартыскаҕа түһэрдилэр.
Маны тэҥэ, грими оҥорорго, сыанаҕа сөпкө охсуһарга, артыыс маастарыстыбатыгар маастар-кылаастар буоллулар. Режиссер Сергей Потапов испэктээктэри хайдах туруорарын, айар үлэтин кистэлэҥнэрин кэпсээтэ.
Тыйаатыр диэйэтэллэрин сойууһун салайааччы Айаал Аммосов кэпсии-кэпсии көрөөччүнү гримнээн көрдөрдө. Хас биирдии артыыс грим ускуустубатыгар үөрэнэр, бэйэтигэр, доҕоругар грим оҥорор эбит. Түмүгэр, эдэр уол уһун бытыктаах, киһи билбэт оҕонньоругар кубулуйда.
Көрөөччүлэр интэриэһиргиир ыйытыыларын биэрдилэр. »Ыарахан оруол иннигэр сиэр-туом оҥороҕут дуо?» — диэн.
«Сахалар буоллахпыт дии. Гостуруолга барабыт, күн өрүү-өрүү партнершабын »өлөрөбүн». Дьиҥнээхтии кыһыйан-абаран, оруолга киирэн «өлөрөҕүн». Оннугу хайа уйулҕа тулуйуой? Ол иһин күн аайы алаадьылыыбыт», — диэн Айаал Александрович кэпсээтэ.
Казань куоракка сырыттахтарына, төбөтүгэр тимир кэлэн дьөлө түһэн кэбиспит. Чөмчөкөтө дьөллөн, тарбаҕынан мэйиитин тутан көрбүт эбит. Онуоха кэлбит сирдэрин, өрүстэрин аһаппатахтар диэн буолбут.
»Оттон оруолтан хайдах тахсаҕын?». Гримернайга чуумпуран олоро түһэллэр, душтаналлар эбит. Аны сүүс төгүл хатылаабыт оруолларын таһы-быһа умнан кэбиһэллэрэ эмиэ баар.
Саха сирэ тыйаатырын ахсаанынан, Арассыыйаҕа Москва, Санкт-Петербург кэнниттэн үһүс миэстэлээх. Барыта 11 академическай тыйаатыр, өссө норуодунай тыйаатырдар бааллар.
Түмүгэр бары биир саалаҕа түмсэн, испэктээктэртэн быһа тардыылары көрдүлэр, санааларын үллэһиннилэр. »Тыйаатыр түүнүгэр» сорохтор артыыс оруолугар киирэн ылан, сорохтор оонньоон, ыйытыыларыгар хоруй ылан, астыннылар.
Ангелина Васильева.
Ааптар түһэриилэрэ.